U·IATTIMGIPAONI
TURA: Bristibar salo, Tura-ni MP Agatha K Sangma, skanggipa Zip Lining-ko Aminda Rangsa songo pakwate on·angaha.
Ia project-ko Meghalaya Tourism a·bachengataha aro project-ko Aminda Rangsa Eco Tourism Co-op Society-ni membor-rang, dongimin niamrango pangchake chalaianggen.
Ia project-ko a·bachengatahani gimin a·dokni Tourism department-ko mittelpilangengon, Garo Hills-o ia skanggipa Zip Lining-ko a·bachengatanichi gipin biaprangoni re·baenggipa tourist-rangko ia biaprangona salbana dakchakgen ine Tura MP, an·tangni ka·dongchakenganiko parakataha.
Meghalaya a·doko Eco-Tourism aro Adventure Tourism-ko tang·doatna gita a·dokni Chief Minister Conrad K Sangma gisiko nange kam ka·enga ine janapatengon, ian jolo songdongenggipa manderangna janggi tangani cholrangko on·skaani gita ong·enga ine Sangma parakataha.
“Skang salrangode manderang chuttina roramon, dal·dalgipa songjinmarangosa aro hotel-rangosa dongna namniktokachim indiba da·ororode manderang, buring bolgrim dakgipa biaprangosa rona namnikbattokaha,” ine Sangma aganenba, ia jolrango an·senggipa aro rona rotogipa biaprang bang·ani gimin ian Eco-Tourism-na aro gipin biaprangoni re·baenggipa manderangko sokachakna namgipa biap ong·a ine parakataha.
North Garo Hills a·jaona paragliding aro Nongalbibra-ona River Rafting-ko ra·baanichi chu·sokgipa ong·anian ia jolrango Adventure Tourism-ni tang·dororobaenganiko mesokani ong·a ineba Tura MP aganaha.
Ia Adventure Tourism-ko a·bachengatanichi manderangna janggi tangani cholrangkoba on·enga ine janapatengon, ia jolni manderangna ua man·a dipet dakchakanirangko on·na kusi ong·gen ine Sangma parakataha.
Ia songo Zip Lining-ko a·bachengatengani gimin Aminda Rangsa Eco-Tourism Co-op Society-ni membor Jengman Sangma, jinmana talate on·angengon, ia Zip Lining-ko November 18 tarikoni salantian pring 10:00 bajioni attam 4:00 bajiona chalaianggen ine parakataha.
Ia tom·anio dongpae jinmana aganprakanggipa gipin manderangara, West Garo Hills a·jani Additional Deputy Commissioner Tangchiring K Sangma, District Tourism Officer Ava Shereen Sangma aro gipinrang ong·a.
