U·IATTIMGIPAONI
SHILLONG: Meghalaya a·dokni gitcham chief minister aro Trinamool Congress (TMC)-ni dilgipa Mukul Sangma baksana adita sak dilgiparang, Bharatiya Janata Party (BJP)-o napskana gita agangrikenga ine koborrangko man·soengon, iani bidingo BJP-ni dilgiparang mamingkoba aganna gita jechakskaaha.
“Iandake chanchirimanirang donggenchimoba da·o dipet anga darangnaba parakna man·kujawa. Da·o dipet iako anga jechakaba jechakjawa aro ong·ja ineba aganjawa indiba somoi sokahaon anga pilakkon na·simangna u·iatgen,” ine Sukrobar salo, Meghalaya BJP-ni state president Rikman Momin parakataha.
BJP-ona re·bana sikgipa manderangde jeba re·bana man·aigen ineba Momin parakataha.
“Adita salrangna skangsan anga BJP-ni state president ong·e kamko jako ra·aha aro da·o dipet anga darangkoba re·baani gimin kobor man·soa dongkuja. Indiba je manderangan chingni party-ona re·bana sikengachim, gimikan re·bana man·aigen,” ine Momin aganaha.
Batanggimin somoirango songbad kingsao parakatani gitade, ia bilsini Assembly election-o TMC, chu·sokgipa ong·na man·jahani gimin TMC-ni MLA sakbri, BJP-o napskana tik ka·ahachim.
Ia MLA sakbrioni saksade Mukul Sangma ong·a ine koborko on·ahaoba ua an·tangde iako raken jegalatskaahachim.
Indake ong·engon, BJP Meghalaya-ni state president-na Rikman Momin-ko songaoni da·onan BJP-ni gital state executive committee-ko songskakujaengachim.
Momin-ni parakatani gitade, gital executive membor-rangni bimingko ua BJP-ni high command-na watatmanaha aro uamang high command-ni ra·chakaniko sengengkua.
Meghalaya a·dokni BJP executive committee-ko ua gital dake taritaina miksonganirang dongama ine sing·anina aganchakaniko on·angengon, “Ia pilakan da·o high command-ni jakosa ong·aia maina gitcham gital chinga pilakan apsan party-nan kamko ka·enggiparang ong·a,” ine BJP-ni state president parakataha.
Lok Sabha election-ni gimin janapatskaengon, “Chinga pangnan election-rangnade tarie dongaia aro chingni committee-ba dongani gimin chinga committee-ni gita kamrangko ka·gen. Committee-ni mitam office bearer-rangkosan dingtangataigen indiba gimikkode dingtangatjawa,” ine Momin aganaha.
 |
ReplyForward
|