U·IATTIMGIPAONI
SHILLONG: Ex-servicemen ba Army-oni neng·takgimin manderangna on·gile Tura-ona watatenggipa Contributory Health Scheme Polyclinic-ko Sukrobar salo, a·dokni Chief Minister Conrad K Sangma, Shillong songjinmani Rhino Training Centre-o a·bachengate on·angaha.
Ia Mobile Polyclinic-ko a·bachengate on·anganio a·dokni Chief Minister, jinmana aganprakangengon, sipai dolrangni aro kamoni neng·takanggipa gitcham sipairangni kamrangna mittelpilangenba, kamoni neng·takanggipa gitcham sipairangna an·seng baljokaniko aro sanna bananiko on·na gita on·gilatenggipa mobile polyclinic-ara, uamangni kamrangna mittelpile on·pilskaani ong·enga ine parakangaha.
“Chinga sorkarini gita kamoni neng·takgimin gitcham sipairangna je kamrangkon a·bachengatahachim, ua kamrangchi uamangna dakchakanirangko on·angkugen. Ia kamna Chief Minister-ni Special Grant-oniko gong lak 5 tangkarangko on·gilatna anga namen kusi ong·bea,” ine Chief Minister parakataha.