U·IATTIMGIPAONI
SHILLONG: Re·baenggipa 2024 bilsini Lok Sabha election-na Shillong Parliamentary seat-oni susaatna gita candidate-ko seokanio neng·nikanirangko chagrongna nangenga ine agananiko National People’s Party (NPP)-ni national president aro Meghalaya a·dokni Chief Minister Conrad K Sangma jegalataha.
Shillong Lok Sabha constituency-o susaatna gita NPP-ni dilgiparang, Trinamool Congress (TMC)-ni state vice president George B Lyngdoh baksa agangrikenga ine jangbingbangenggipa kattarangni gimin sing·aninaba ua mamingkoba aganna gita jechakaha.
Lok Sabha election-na candidate-ko seokani gimin janapatengon, NPP-o candidate-ko seokna gita cholrang bang·en donga aro candidate-ko seokanio jinmasa chanchie ja·kuko de·na siengani gimin party-ni seokgipa candidate-ko pilakan ra·chakaigen ine Sangma parakataha.
Koborko man·soani gitade, re·baenggipa bilsini Lok Sabha election-o Shillong Parliamentary seat-oni susana gita NPP-ni tikitko Mawhati-ni gitcham MLA Dasakhiat Lamare-na on·china Dhar Group, NPP-ni dilgiparangko petchal ka·engachim aro ia Dhar Group-na MLA-rangoniba sakdok ba saksni chakpaanirangko on·engachim.
Mitam kobor on·timgiparangni u·iatani gitade, Trinamool Congress (TMC)-ni dilgipa George B Lyngdoh-kosa NPP-ni dilgiparang, NPP-ona rimbae Shillong Parliamentary seat-o susaatna nangnikanirang dongachim indiba Shillong seat-o Dasakhiat Lamare-ko NPP-ni candidate ong·atchina Dhar brothers, NPP-ko aganahani gimin NPP-ni dilgiparang chanchianiko dingtangatna nangskaahachim.
Iani bidingo sing·anina aganchakaniko on·angengon, “Ian namgipa chin ong·a maina ian NPP-o gisik nanggipa manderang bang·kuenga ine mesokani ong·enga. NPP-ni tikitchi susana sikenggipa manderang bang·a ine ian mesokaniba ong·enga,” ine Sangma parakataha.
NPP-ni national executive meeting-ko bakan ong·atna sienga ine janapatengon, je a·dokrangon NPP-ni membor-rang dongachim, uandakgipa a·dokrangko da·o Lok Sabha election-o susana gita dorgasto galani kamrangko a·bachengatchina ia tom·anio u·iatgnok ine NPP-ni national president parakataha.
Tura Lok Sabha seat-ni gimin janapatskaengon, ia changoba Tura-ni MP ong·enggipa Agatha K Sangma susatainaba gnang indiba dorgastorangko nichengesa party-ni dilgiparang tik ka·anggen ine Sangma parakataha.
