U·IATTIMGIPAONI
SHILLONG: Meghalaya a·doko bangki dongenggipa project-rangko chu·sokgipa ong·atna gita sorkari aro dingtang dingtang dolrangni gisepo bakrime kam ka·china gita a·dokni Trinamool Congress (TMC) didiataha.
“Project-rangko chu·sokgipa ong·atna an·ching bang·en namdapatanirangko nangenga, uni gimin pilakan sorkari baksa bakrimaniko on·na nangenga. Kamrangko ka·anio dingtang dingtang neng·nikanirang dongani gimin matnanggrike donganichide maming namgnirangko ra·bana man·jawa,” ine TMC-ni state vice president George B Lyngdoh, kobor ra·timgiparangna aganaha.
Lyngdoh-ni parakatani gitade, a·doko dingtang dingtang project-rangko chu·sokatanio manderangni skani, songsalni gita neng·nikani, a·arangko ra·ani aro uandakgipa dingtang dingtang neng·nikanirangko sorkari chagrongna nangenga.
Meghalaya a·doko dingtang dingtang project-rangko a·bachengna man·chipjaengachim aro a·selrangoni mingsade ia project-rangna a·arangko ra·anian ong·engachim.
“A·doko songdongenggipa mande sakantian ku·pattianirangko on·na nanga aro apsan somoion politics-na agreba manderangni nanganirangkosa nichengna nanga. Ia project-rangko chu·sokgipa ong·atna gita an·ching dingtang dingtang dolrang baksa agangrikna nanga,” ine Lyngdoh aganaha.
TMC state vice president-ni parakatani gitade, a·doko mitam project-rangde matchotgija dongenga aro mitamrangkode a·bachengatnan man·chipjaengachim.
“Opposition dolrangoni dolsa ong·pae, ian a·dokni manderangna nama ong·jaenga ine chinga aganna ska. Ia project-rangko matchotna gita somoirangko nanggenchimode ja·mano korosrang gadoange ian sorkarinasa boja ong·gen,” ine Lyngdoh aganaha.
Ia project-rangko matchotatna man·chipjagenchimode a·dokni manderangsa neng·nikanirangko man·gen ineba ua aganaha.
