U·IATTIMGIPAONI
SHILLONG: Salgittamna ong·atanggipa Shillong Cherry Blossom Festival, Robibar attamo Ronan Keating aro dingtang dingtang git ring·giparangni ga·subee gitrangko ring·e manderangko an·saoatanichi matchotangaha.
Ia chang Cherry Blossom Festival-ko Ri Bhoi a·jani Bhoirymbong-o donggipa Madan Kurkalang-o ong·atangaha aro ia festival ba manianiko November 17 tarikon a·bachengatahaoba skanggipa salode mikkarang waanichi, program-rangko ong·atna man·jahachim.
Ia Cherry Blossom Festival-ko ong·atanio, a·dokni Tourism Minister Paul Lyngdoh, mongsonggipa sokgipa ong·e bakko ra·angaha aro manianio jinmana aganprakangengon, ia Cherry Blossom Festival-ara dingtang dingtang biaprangoni manderangko ia biapo ku·cholsan ong·atani festival ba maniani gita ong·aha ine aganangaha.
Ia Cherry Blossom Festival-ko ong·atanichi manderangna an·senge rona cholrangkosan on·aigija jolni manderangna, dokkanrangko dake an·tangtangna man·dapanirangkoba ra·bana cholrangko on·ani gitaba ong·a ineba Minister aganaha.
Gnigipa sal, chong·motan November-ni 18 tariko, Hybrid Theory, NE-YO, Meba Ofilia, Pink Panda, Snow White, Rahul Rajkhowa, Banjop, Kenny Music, Gwyneth, CYCO & Chevinia aro uandakgipa dolrang, gitrangko ring·e manderangko an·saoatangaha aro gittamgipa sal, chong·motan Robibar salo, Ronan Keating, Jonas Blue, SANAM, Banjop Sohklet, Garo Hills-ni Nokpante aro dingtang dingtang dolrang, gitrangko ring·e manderangko an·saoatangskaaha.
Ia salgittamna ong·atanggipa Cherry Blossom Festival-o cha·ani ringani aro ma·manti bosturangkoba nie ra·na aro brena gita manderang cholrangko man·tokaha.
