U·IATTIMGIPAONI
SHILLONG: Meghalaya a·dokni skanggipa Deputy Chief Minister aro Mawlai constituency-ni gitcham MLA SD Khongwir, Mongolbar pringo, NEIGRIHMS Hospital-o a·gilsakko watangaha. Ua bilsi 90 ong·ahachim.
Ru·utbea sal somoirangna saaniko man·ani ja·man Khongwir sagi, Mongolbar pringo a·gilsakko watangaha aro uni siangani ja·man uni manggisiko Mawlai Nonglum-o donggipa uni nokona ra·angaha.
A·gilsakko watanggipa SD Khongwir sagi, 1972 bilsini Assembly election-o skanggipa changna susae seokako man·chengahachim aro bilsi 25-na kingking Mawlai-ni MLA ong·e dangdike on·angaha.
Ua 1993 bilsini Assembly election-o susae seokako man·aha indiba 1998 bilsini election-ode ua susajahachim.
Uni politics-o kamko ka·angani somoio ua Meghalaya a·dokni skanggipa deputy chief minister aro dingtang dingtang department-ni minister-rangba ong·angahachim.