U·IATTIMGIPAONI
SHILLONG: Mikkang bilsini Academic Session dipet Meghalaya a·doko Class 1-oni Class 10-ona National Council of Educational Research & Training (NCERT)-ni ki·taprangko ra·gatna gita copyright-ko on·china mol·mole bakan a·dok sorkari, NCERT-na sedoatgen.
A·dokni Education Minister Rakkam A Sangma-ni kobor ra·timgiparangna parakatani gitade, mikkang bilsini Academic Session dipetan class 1-oni class 10-ona NCERT-ni text book-rangko jakkalna miksongengahani gimin sorkari, NCERT-ni copyright-ko bi·atna nangnikenga.
“Copyright permission-na chinga bakan NCERT-na sedoatna tik ka·aha,” ine ua aganaha.
Class 1-oni class 10-ona NCERT-ni text book-rangko ra·gatna sorkari tik ka·aha ine janapatengon, 2018 bilsionin sorkari, class 11 aro class 12-naba apsankon dakahachim ine Education Minister parakataha.
“Mikkang bilsini academic session a·bachengna skangan chinga text book-rangko February jaode man·na nangengahani gimin da·alo chinga dingtangmancha iani bidingo tom·e chanchirimangaha,” ine Sangma aganaha.
NCERT-ni copyright-ko man·ahaon, textbook-rangko chapa ka·atna man·gnok ine janapatengon, iani bidingo Education department, dingtangmancha scrutiny committee-koba songenga ine Education Minister parakataha.
“NCERT-ni textbook-rango a·dokna kragijagiparang dongama dongja uko ia committee-an chingni subject expert-rang baksa nigrike am·sandianggen,” ine ua aganaha.
Meghalaya a·doko ta·raken curriculum-ko ra·gatna gita sorkari rakbee kamrangko ka·enga ine janapatengon, “Iachi chinga a·dokni syllabus-o kragipa curriculum-ko ra·bana man·gen. Curriculum-ko tarina man·ahaode MBOSE, DERT aro Education department, textbook-rangko taridapna man·gnok aro a·dokna nangani kri textbook-rangko niroke tarina man·gnok. An·chingni textbook-rango chinga NCERT-ni chu·gimik textbook-kode ra·gatjawa indiba a·doktangni nanganirangba donggen. Indiba da·o chinga NCERT-ni copyright-ko man·ahaode kamrangko a·bachengna man·gnok,” ine Education Minister parakataha.
