U·IATTIMGIPAONI
SHILLONG: Re·baenggipa Lok Sabha election-o Tura parliamentary seat-na susaatna gita NPP, da·oni MP Agatha Sangma-nan party tikitko on·ainaba donga.
“Chinga 100 percent ka·donga je Agatha Sangma-an chingni candidate ong·aigen indiba iani bidingo election Committee-sa bon·kame chanchie tik ka·gen” ine NPP dilgipa Marcuise N Marak aganaha.
Election-ni da·o mamingkoba aganna man·kuja maina da·odipet election-ni balwarang baldapkuja ine aganengon, Tura aro Shillong parliamentary seat ge·gnion NPP uamangni candidate-rangko susaatgen ineba Marak aganaha.
Shillong Lok Sabha seat-o susana gita party tikitko bi·giparangni bidingo sing·on, Ampareen Lyngdoh, Dasakhiatbha Lamare aro HM Shangpliang mangni biming da·o dipet nakatenga, unigisepon sako seokgen uani bidingo elections committee bakan chanchie tik ka·gen, Marak aganaha.
Khasi Hills a·jaode election-rango NPP namedake chu·sokgipa ong·na man·jaenga ingipa kattarangkode ua jechake aganaha.
