U·IATTIMGIPAONI
TURA: Meghalaya a·doko da·onan chatro chatrirangni scholarship-rangko on·kujaengani a·sel chatro chatrirang, an·tangtangni admission, tuition fee aro porikkana form-rangko gapatanio neng·nikanirangko chagrongna nangtokengani gimin scholarship-rangko ta·raken sokatchina gita Tura-ni MDC Bernard N Marak, a·dokni Education Minister Rakkam A Sangma-na sedoataha.
“Chatro chatrirang da·onan an·tangtangni scholarship-rangko man·tokkujaengani a·sel bang·a neng·nikanirangko chagrongna nangtokengaha. Bang·bata chatro chatrirangan scholarship-rangko man·tokujaengani a·sel tuition fee-rangko gamna man·tokjaenga aro porikkana form-rangkoba gapatna man·tokjaenga. Kangal cholgri ong·pagipa chatro chatrirangde an·tangtangni admission aro gipin gamna nanganirangko gamna gita scholarship-on pangchakna nangtokpaengachim indiba scholarship-rangko da·alonan man·tokkujaengani a·sel iandakgipa neng·nikanirangko chagrongna nangtokengaha,” ine Education Minister-na sedoatgipa chittio Marak parakataha.
Umbrella Scholarship-ni bidingo janapatengon, ian National Scholarship Portal (NSP) gita chatro chatrirangni tuition fee, ki·taprang aro gipin nanga korosrangna sorkarini on·enggipa tangka paisarang ong·achim indiba chatro chatrirang an·tangtangni scholarship-rangko man·tokkujaengani a·sel tuition fee aro college-ni gipin nangchongmota fee-rangkoba gamna man·jaenga aro ia tuition fee-rangko gamna man·jagenchimode chatro chatrirangna porikka sena gita admit card-rangko on·jawa ine Tura MDC talataniko on·angaha.
“Ian chatro chatrirangni dal·begipa neng·nikani ong·engani gimin anga iana gisik nange jako ra·china aro chatro chatrirangna ta·raken scholarship-rangko watatchina nang·ko mol·molenga. Chatro chatrirang, an·tangtangni porikkana form-rangko gapatna man·na gita somoirangko on·dapchina gita NEHU baksa agangrikchinaba anga nang·ko mol·molenga,” ine Marak, Education Minister-na sedoatgipa chittio parakataha.
Chatro chatrirangna scholarship-rangko da·o antisa antignini gisepon watatgnok ine Mongolbar salosan Education Minister parakatskaahachim ine nikna man·a.