U·IATTIMGIPAONI
SHILLONG: Meghalaya a·doko Accredited Social Health Activist (ASHA) worker-rangni dabianirangko knachakjaengani gimin batanggimin salrangonin kamrangko ka·gija jingjengattokengon, a·dokni Health Minister Ampareen Lyngdoh-ni agangrikna okamataniko Meghalaya ASHA Workers Union (MAWU) ra·chakangaha.
“Health Minister baksa Budbar salo apsan asonge agangrikna gita chingko Health department okamataha aro DHS (MI)-ni chingko okamate seatgipa chitti chingona sokbaaha. Chingni dabianirangko chu·sokatna gita Health Minister ku·rachakgen ine ka·dongani baksa chinga uko grongna re·angenga,” ine MAWU-ni president Marajune Myrsing, kobor ra·timgiparangna aganaha.
Ia tom·aniko Budbar pring 11:00 bajioni, Health Minister-ni chamber-o ong·atenga ineba ua aganaha.
ASHA worker-rangni jingjengatenggipani bidingo sing·anina aganchakaniko on·angengon, Health Minister baksa tom·e agangrikanio chu·ongnikaniko man·genchimode uamangni indefinite strike-ko ra·galpilani cholrang donga indiba chu·ongnikaniko man·jagenchimode uamangni manchisogimin gitan November 27 tarikoni ‘indefinite strike’-ko ong·atangkuaigen ine MAWU-ni president parakataha.
“Chingna Health Minister-ni ku·rachakanikosa nangenga,” ine ua aganaha.
ASHA worker-rangni jingjengatanichi sanna banani kamrangko ka·anio nangchakeaniko man·engahani gimin a·dokni Health Minister Ampareen Lyngdoh, suk ong·gijaniko parakatenba, ASHA worker-rangko gronge agangrikna gita okamatahachim.
“Meligrikgijanirangko namatna gitade apsan asonge agangrikanichisan man·aigen. Uni gimin anga uamangko re·bae an·tangtangni nanganirangko angbaksa agangrikechina okamatenga,” ine Lyngdoh aganaha.
ASHA worker-rangni dabianirangko sorkari knachakjaengani gimin November 27 tarikoni ‘indefinite strike’ ba ari gri kam dontongate jingjengatna MAWU tik ka·angahachim.
ASHA worker-rangni man·gniko japrako gong 2000/-oniko gong 5000/-ona bariatchina gita MAWU dabiengachim indiba sorkari, uamangni dabianiko chu·sokate on·kujaengani gimin batanggimin salrangonin ASHA worker-rang kamrangko ka·gija jingjengattokengachim ine nikna man·a.
