U·IATTIMGIPAONI
SHILLONG: Meghalaya a·doko Trinamool Congress (TMC)-ni MLA-rangko, Bharatiya Janata Party (BJP) baksa bakrimatna gita TMC-ni dilgipa aro a·dokni gitcham chief minister Dr Mukul Sangma, BJP-ni dilgiparang baksa agangrikenga ine kobor on·aha.
Kobor on·timgiparangni u·iatani gitade, batanggimin salrango TMC-ni dilgipa Mukul Sangma, New Delhi-o BJP-ni dilgiparangko grongenba, TMC-ni MLA-rangko BJP baksa bakrimatani bidingo agangrikaha aro TMC-ni MLA-rang, BJP baksa bakrimangbebegenchimode, re·baenggipa jao dambonga a·dokrango ong·atgipa election-ni result-rangko parakani ja·man ong·naba gnang.
Mukul Sangma-ni agangrikanirang chu·sokgenchimode, komibeoba ua TMC-ni sakgni ba sakgittam MLA-rangko rime BJP baksa bakrimangnaba gnang ineba kobor on·timgiparang parakataha.
New Delhi-o BJP-ni dilgiparangko gronge agangrikna gita Mukul Sangma-ko BJP-ni dilgipa aro a·dokni Cabinet Minister AL Hek dakchake on·enga ineba koborko man·soaha.
Mukul Sangma aro uni MLA-rang, BJP-o napna miksonganirangba dongama ine sing·anina aganchakaniko on·angengon, iani gimin ua an·tangde mamingkoba ma·sia dongja ine Hek parakatskaahachim.
Koborko on·ani gitade, BJP-ni state president Rikman Momin, jean Mukul Sangma baksa meligipaba ong·achim, uaba Mukul Sangma-ko BJP-o ong·atna nangnikengachim.
Iani a·selsa Meghalaya a·doko BJP-ni executive committee-ko songna gita somoi ra·kuengakon ineba kobor on·timgiparang aganaha.