U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong Parliamentary seat-oni susachina National People’s Party (NPP)-ni dilgiparang nangnikgenchimode ua susana kusi ong·aigen ine a·dokni Cabinet Minister aro East Shillong constituency-ni MLA Ampareen Lyngdoh parakataha.
“Iako NPP-ni dilgiparangsa tik ka·gen aro angade uamangko didina man·ja. Uamang angko susachina nangnikode anga uamangni nangnika gita susana kusi ong·aigen,” ine Lyngdoh aganaha.
Koborko on·ani gitade, Lyngdoh an·tangan, re·baenggipa bilsini Lok Sabha election-o Shillong seat-oni susana NPP-ni dilgiparango bi·aha aro uni bi·aniko NPP-ni dilgiparang ra·chakahachim.
Lyngdoh-na NPP-ni bang·bata dilgiparang aro Dhar company-ba chakpaaniko on·enga ineba kobor on·timgiparang parakatahachim.
Iani bidingo sing·anina aganchakaniko on·angskaengon, “Da·o dipetde anga mamingkoba aganna man·kujawa. Ian kakket ong·ja aro iandakgipa koborrangko NPP-ni dilgiparangsa na·simangna u·iatna bil donga,” ine Lyngdoh aganaha.
Candidate-ko seokanio NPP-o dingtang dingtang niamrang donga ine janapatengon, “Anga NPP-na kam ka·gipa ong·e aro a·dokni manderangna dangdike on·na gita an·tangko on·kanggimin ong·e, angko mai gadango dangdike on·na gita party-ni dilgiparang nangnikenga, uko anga jako ra·na kusi ong·aigen,” ine East Shillong MLA parakataha.
Lyngdoh-ni aganani gitade, an·tangna tikatgimin kamrangko ua maming saloba jechakrongja aro party dilgiparangni nangnikani gitan chu·sokate on·rongaiachim.
“Anga an·tangna tikatgimin kamrangko jako ra·e chu·sokgipa mande ong·a indiba anga an·tangni cha·na man·ana batede cha·jawa,” ine ua aganaha.
