U·IATTIMGIPAONI
SHILLONG: Meghalaya a·doko bikotgimin koelarangko am·sandienba a·dok sorkarini ning·o donenggipa adita koelarang gimaengani gimin iani bidingo sandirokaniko ta·rakatchina gita Justice (Retd) BP Katakey-ni Meghalaya High Court-na chang 18-gipa interim report-o a·dok sorkarina ku·pattianiko on·angaha.
A·dok sorkarini ning·o donenggipa koelarangoni metric ton lak 13 koelarang gimaengani gimin inquiry-ko dakenga ine Mining & Geology department-ni Secretary, Committee-na u·iatahachim.
Indake ong·engon, a·dok sorkarini ning·o donenggipa koelarang gimaengani gimin sandirokaniko ta·rakbatatchina gita officer-rangna ge·etaniko on·china Justice Katakey-ni report-o a·dok sorkarina ku·pattianiko on·angaha.
A·doko niam gri koela bikotaniko am·sandina gita Meghalaya High Court-ni songe on·gipa committee-ba iana skang, a·doko maikai metric ton lak 18 koelarang gimaaha, iani bidingo sandirokaniko a·bachengama a·bachengkuja ine a·dok sorkario sing·doatahachim.
A·dok sorkarini ning·o donenggipa koelarang gimaengani gimin a·dok sorkariko sing·doatengon, deputy commissioner-rangni report-ko on·aniode gimik metric ton lak 19 koelarang donga ine mesokachim indiba drone-chi am·sandianirangko dakaniode MT lak 14-san dongaia ine parakskaaha, indide indita koelarangara bachi gimaaha ine Justice Katakey-chi dilenggipa committee sing·doataha.