U·IATTIMGIPAONI
SHILLONG: HNLC-ni dilgiparangni kosako bangki dongenggipa case-rangko kema ka·kujaskal sorkari baksa agangrikaniko dakangkuna man·jawa ine parakatani ja·man, HNLC-ni dilgiparangko maming jajrengchakani gri agangrikna re·bachina gita a·dok sorkari okamataha.
HNLC dolni kosako bangki dongenggipa pilak case-rangko kema ka·e ceasefire-na songgigrikanio soi ka·jaskal da·o changgipin agangrikanio bakko ra·na man·jawa ine adita salrangna skangsan, HNLC-ni chairman aro commander-in-chief Bobby R Marwein baksana general secretary Sainkupar Nongtraw, sorkarina niamko on·atmanahachim.
Sorkari baksa agangrikani kamrangko nirokna gita HNLC-ni gital vice chairman Teimiki Laloo-na pakwatmanahani gimin HNLC-ni chairman ba general secretary-de sorkari baksa agangrikanio bakko ra·na man·jawa ineba HNLC-ni dilgiparang parakatahachim.
Indake ong·engon, sorkari baksa a·bachengatgimin agangrikaniko dontongjachina aro jajrengani grian agangrikna re·bachina gita HNLC-ni dilgiparangko a·dokni Deputy Chief Minister Prestone Tynsong didiataha.
“HNLC-ni u·iatgipa kattarangko anga poraimanaha indiba chinga uamang baksa mikkanggrik asonge agangrikjaskalde aro uamang maiko nangnikenga uko ma·sigijade chingni gisepo agangrikani chu·sokna man·chipjawa,” ine Tynsong aganaha.
“A·dok aro ma·mong sorkari dolgnian HNLC bobil dol baksa agangrikna nangnikenga. HNLC bobil dol baksa changsa apsan asonge agangrikna skangba chingni gisepo u·iatgrikanirang dongmanaha aro chinga a·dok sorkari aro ma·mong sorkari dolgnian HNLC-ni membor-rangko agangrikangkuchina mol·molahachim,” ineba ua aganaha.
Deputy Chief Minister-ni aganani gitade, HNLC-ni dilgiparang baksa bon·kame agangrikanioba uamangko je somoioba re·bae agangrikechina gita sorkari aganatahachim.
“Jabrina kingking chinga uamangni membor-rangko simsake donahaode aro darangkoba rim·jahaode da·o uamang maina jajrengna nangskaenga?” ine Tynsong sing·doataha.
“Uni gimin sorkario ka·dongchaka gri ong·jachina anga HNLC-ni dilgiparangko mol·molatenga. Meghalaya a·dokni ning·o agangrikna gita uamang naljoke nikjaenga ong·ode chinga uamang baksa Kolkata ba gipin biaprango agangrikskana man·aigen,” ineba Tynsong parakataha.
