U·IATTIMGIPAONI
SHILLONG: Meghalaya a·doko HIV/AIDS-ni bidingo gital dake songtaigipa Meghalaya Legislator’s Forum-ni governing body, Sukrobar salo dingtangmancha Shillong songjinmani Pinewood Hotel-o tom·aniko ong·atangaha.
Ia tom·aniko Meghalaya Assembly-ni Speaker Thomas A Sangma dilangaha aro tom·anio a·dokni Chief Minister aro Meghalaya Legislator’s Forum-ni Chief Patron Conrad K Sangma baksana Deputy Speaker Timothy D Shira, Health Minister Ampareen Lyngdoh, Opposition dolni dilgipa Ronnie V Lyngdoh aro gipin MLA-rangba dongpae bak ra·angtokaha.
Ia tom·anio People Living with HIV (PLHIV) ba HIV baksa janggi tangenggipa manderango nangchakegipa mingdok kamrangni bidingo Meghalaya Legislator’s Forum-ni governing body chanchirimangaha.
Tom·a matchotani ja·man kobor ra·timgiparangna talataniko on·angengon, manderangna mikrakatanirangko on·anichi a·dokni MLA-rangba, HIV/AIDS-ko warachakanio bak ra·na sienga ine Assembly-ni Speaker Thomas A Sangma parakataha.
Sangma-ni parakatani gitade, Meghalaya a·doko HIV/AIDS sabisini giproroaniko champengna gita sorkari, dingtangmancha mission mode-o kam ka·gen ine ia tom·anio Chief Minister parakataha.
