M’laya sorkarini gita award-ko on·a
U·IATTIMGIPAONI
SHILLONG: Cha·ani tarisusaani TV program ‘Master Chef India’-o bakko ra·enggipa A·chik me·chik Nambie Jessica Marak, semi final-ona doange A·chikrangnasan ong·aigija Meghalaya a·dok gimiknan mikkim rasongko ra·bataiaha aro uni chu·sokgipa ong·anina Meghalaya sorkari, Sukrobar salo dingtangmancha una award-ko on·angaha.
An·tangna ia award ba boksisko on·ahani gimin Meghalaya sorkariko aro a·dok gimikni manderangko mittelpilatengon, ua saksa West Khasi Hills a·jani chonbegipa songoni ong·genchimoba Master Chef India gita dakgipa gadango, a·dokni cha·ani ringaniko mesokna man·aniara una mikkim rasongni ong·aha ine Nambie Jessica Marak parakataha.
Salgro salaram a·dokrango donggipa dingtang dingtang jatrangni cha·ani ringanirangko ua see rakkina namnikgipa ong·a ine janapatengon, Chennai songjinmaona ua re·ange ua Dosa aro Biryani cha·anirangko cha·e be·ekani ja·mansa dingtangmancha salgro salaram jolni cha·ani ringanirangko sandina gisik nangbana a·bachengaha ine Marak parakataha.
“Salgro salaram jolrango cha·ani ringanirangko tariani recipe-rangko anga sandina a·bachengaha aro anga iarangko ki·taprangoniko man·aha. Uni ja·mansa anga an·tangni YouTube channel-ko bikote, cha·anirangko tarie mesokna a·bachengaha,” ine Marak aganaha.
Nambie Jessica Marak-ni aganani gitade, salgro salaram jolni cha·anirangara totelgipa cha·anirang gita ong·achim aro Master Chef India-o bak ra·enggipa chef-rang, a·songni aro a·gilsak gimikni cha·anirangko tarina sapgiparang ong·skaachim.
Cha·ani tarianian uni namnikbatgipa kam ong·a ine janapatengon, uni tarigipa cha·anirangko dingtangani gimin Master Chef India-ni judge-rang namnikskaa ine Marak parakataha.
An·tangtangni song·na channa changaniko see donchina gitaba Marak, salgro salaram jolni manderangko didiataha.
West Khasi Hills a·jani Upper Rangsa songoni ong·e Nambie saksa cha·ani tarina changgipa me·chiksan ong·aija indiba niksamsoani donggipa me·chikba ong·achim.
Uni YouTube channel ‘Eat Your Kappa’-o ua dingtangmancha A·chikrangni cha·anikosan ong·aigija salgro salaram jol gimikni cha·anirangkon tarie mesokrongachim.
Indake ong·engon, Master Chef India-o chu·sokgipa ong·ahani gimin a·dokni Chief Minister Conrad K Sangma-ba Nambie Jessica Marak-na mittelpilani aro an·tangni namgipa skanirangko parakataha.