U·IATTIMGIPAONI
SHILLONG: Meghalaya a·doko niam gri koela bikotani aro salruraanirangko champengna man·jaengani gimin NPP-chi dilenggipa MDA sorkariko Voice of the People’s Party (VPP) matnangataha.
A·doko niam gri koela bikotani aro salruraaniko bon·atna man·jaengani suk ong·gijaniko parakatengon, kacharini aro National Green Tribunal (NGT)-ni on·gimin niamrangko nikchrakpile pe·aniara MDA sorkarini, Constitution-o pangchake sorkari rikna sikgijaniko mesokanisa ong·enga ine VPP-ni ku·wattimgipa Batskhem Myrboh parakataha.
A·doko niam gri koela badinganirangko nikna man·engoba nikja dake dongenga ine sorkariko matnangatengon, COVID sajinmana lockdown-ko ra·gatengmiting somoirangoba niam gri koelarangko bikote salruraahachim aro iako pilakan ma·sia ine Myrboh parakataha.
“A·doko niam gri koela bikotaniko aro salruraaniko champengna gita MDA sorkario pilak bilrangan donggenchimoba batesa a·doko niam gri koela badinga inako jegalskaenga. Ian ia sorkarini kakket ong·gijaniko aro tangka paisana mikpakma nianiko mesokani ong·a,” ine VPP-ni dilgipa aganaha.
Adita salrangna skangsan, Justice (retired) BP Katakey-ni 18-gipa report-ko Meghalaya High Court-na on·anio, a·doko niam gri koela salruraanirang komikujaenga ine parakatahachim.
Uni report-o parakanian, a·doko niam gri koela bikotani aro salruraanirang dongja ine a·dok sorkarini a·kanganiko ‘tol·gipa’ ine mesokaniba ong·skaaha.
A·doko niam gri koela bikotani aro salruraanirangko ma·simikja dakenganina sorkariko matnangatengon, “Niam gri koelarangko bikote salruraanichide a·dokna maming man·dapanirang dongjaenga aro ian bilo ong·enggipa manderang baksa jak donggipa manderangnasan man·gnirangko on·enga,” ine Myrboh parakataha.
Meghalaya a·doko scientific mining ba niam gita koela bikotaniko September jaon a·bachenggnok ine Chief Minister Conrad K Sangma-ni agangipa kattarangko gisik ra·atpilangengon, “Da·o December ja ong·na sipilengahaoba scientific mining-ko a·bachengatkujaenga indiba niam gri koela bikote salruraanide batroroangskaengaha,” ine VPP-ni ku·wattimgipa aganaha.
 |
ReplyForward
|