U·IATTIMGIPAONI
TURA: Assam a·dokni Chotipara songo gnigipa changna 100 Drums Wangala manianiko Sonibar salo ong·atangaha aro ia manianiona Assam aro Meghalaya a·dokrangoni bang·bea manderang re·bae bakko ra·angtokaha.
Chotipara songo ia Wangala manianiko Garo Cultural Forum aro Garo Students Union (GSU) nangrime ong·atangaha aro Assam-o A·chikrangni dakrongbewal gita ia Wangala manianiko gnigipa changna ong·ataha.
Ia 100 Drums Wangala manianio Assam a·doko donggipa Goalpara aro Kamrup a·jarangoni dolsku Wangalgipa dolrang bakko ra·angaha aro ia manianio, adita salrangna skang Garo Hills-o ong·atanggipa 100 Drums Wangala manianio skanggipa boksisko man·gipa Gondenggre songni Wangalgipa dolba bakko ra·eaha.
Ia manianio Meghalaya a·dokni Education Minister Rakkam A Sangma, mongsonggipa sokgipa ong·e bakko ra·angaha aro manianio ua jinmana aganprakangengon, A·chikrangni ia nitobegipa daka rikaniko ripinge rakkina nangengani gimin aganangenba, da·ororo bang·bata A·chik songrangon, jatni daka rikanirangko ripingna gita iandakgipa program-rangko ong·atengaha ine an·tangni kusi ong·aniko parakangaha.
Mikkangchiba ia Wangala manianiko ong·atangkuchina gitaba ua jolni dilgiparangko aro dingtang dingtang dolrangko didiangaha.
Ia 100 Drums Wangala manianiko ong·atanio dongpae bakko ra·anggipa gipin manderangara, Bajengdoba-ni MLA Pongseng R Marak, Rabha Hasong Autonomous Council (RHAC)-ni Deputy CEM Ramakant Rabha, RHAC-ni Executive Member Frylin R Marak aro gipinrang ong·a.
