U·IATTIMGIPAONI
TURA: Ia bilsioba Meghalaya Tourism-ni dakchakanichi Me·gong Festival-ko RockskiEMG, City Flora aro Artsourced nangrimenba, re·baenggipa December 7 tarikoni 9 tarikona Baljek Airport-o ong·attaina sienga aro ia chang Me·gong Festival-o Netherlands a·songni mingsinggipa Vengaboys dol, gitrangko ring·e manderangko an·saoatanggen.
Vengaboys dolko Wessel van Diepen aro Dennis van den Driesschen bikotahachim aro ia dolo Kim Sasabone, Denise van Rijswijk, Robin Pors aro Donny Latupeirissa gitrangko ring·enga.
Ia Me·gong Festival-o Vengaboys dol, uamangni mingsinggipa gitrang, jekai ‘We Like to Party’, ‘Boom Boom Boom Boom’, ‘We’re Going to Ibiza’ aro uandakgipa gitrangko ring·e mesokangna sienga.
Koborko on·ani gitade, ia salgittamna ong·atenggipa Me·gong Festival-o gipin a·songni gipin dolrangba re·bae gitrangko ring·anggen aro unbaksana a·doktangni mingsinggipa dolrangba gitrangko ring·anggen.
Re·anggipa bilsiode Mukroh songo a·sel ong·ani gimin ia Me·gong Festival-ko ong·atna man·jahachim indiba ia festival-ni pal dingtangmancha ia apsan biapon concert-ko ong·atangskaahachim ine nikna man·a.
