U·IATTIMGIPAONI
TURA: North Eastern Hill University (NEHU)-o nangchakegipa dingtang dingtang kamrango nirok sandianirangko nangengani gimin Tura-ni social activist ba songsalna kam ka·gipa saksa Cherian Momin, a·dokni Chief Minister Conrad K Sangma-na sedoataha.
Skanggipao ua, NEHU campus-ni dingtang dingtang kamrangna manderangko seokani bidingo janapatenba, university-o India sorkarini Reservation Policy baksade dingtanggrikenga ine kamna manderangko seokanio darangnaba mikkang niteani dongjachina ine Chief Minister-ko didiataha.
Kamna u·iatanio nichanggalani dongenga ine janapatskaengon, skang on·gimin u·iataniko ra·pilenba, campus ge·antion dingtangmancha kamni gimin aro badita ge kamrang donga uko janapenba u·iataniko on·taichina gita Momin didiataha.
NEHU Tura campus-ko name nirok sandianirang dongjaenga ine an·tangni suk ong·gijaniko parakatskaengon, Tura campus-o emergency service, sanna banani cholrang aro nangchongmotgipa cholrang dongjaengani a·sel chatro chatrirangsan ong·aigija kam ka·enggiparangba neng·nikanirangko chagrongna nangtokenga ine NEHU Tura campus-koba nirokatchina Momin didiataha.
NEHU Tura campus-o bilsi 15-oni bilsi 20-mang ong·pile contract-na kamko ka·enggipa manderangni bidingo janapatskaengon, uamangnaba kamni kri, kamko regularize ka·china aro kamrangko ra·doatchina gita Momin, a·dokni Chief Minister-ko didiataha.