U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong Parliamentary constituency-oni susana gita a·dokni Cabinet Minister aro East Shillong constituency-ni MLA Ampareen Lyngdoh-ko National People’s Party (NPP)-ni candidate dake seokahani gimin ia election-o ua chegipa ong·na man·genchimode, an·tangni biapko ua demechikgipa Grazel-na on·angskana skani dongenga ine kobor on·aha.
Re·baenggipa bilsini Lok Sabha election-na NPP, Ampareen-ko Shillong constituency-na aro Tura-ni MP Agatha K Sangma-ko Tura Lok Sabha constituency-na candidate dake parakatahachim.
Indake ong·engon, Lok Sabha election-o ua seokako man·genchimode an·tangni demechik Grazel-na an·tangni biapko on·angna skaniko Ampareen, NPP-ni national president Conrad K Sangma, state president Prestone Tynsong aro gipin dilgiparangna parakmanaha ine kobor on·timgiparang u·iataha.
Lok Sabha election-o Lyngdoh chegenchimode, uni biapko sawa ra·rikgen, iani bidingo da·o dipet NPP-ni gisepo chanchirimanirang ong·enga ineba kobor on·timgiparang parakataha.
Kobor on·timgiparangni u·iatani gitade, ia bilsini a·bachengachibara ong·atanggipa Assembly election-o Ampareen Lyngdoh-ni demechik Grazel-an, East Shillong constituency-o ma·gipana election campaign-koba ka·dilahachim. Ampareen Lyngdoh-ni demechik Grazel, Jawaharlal Nehru University-o MPhil-ko matchote da·o Ph.D-na an·tangni thesis-ko seengachim.
An·tangni ma·gipana Grazel-an, chadamberangni dakchakanirangkoba man·dile on·ahachim ineba kobor on·timgiparang parakataha.
Iani bidingo brigipa changna MLA ong·enggipa Ampareen Lyngdoh-o sing·sandiatskaon, ua Lok Sabha election-o susae chegipa ong·ani ja·mansa iani bidingo chanchigen ine parakatskaaha.
Niam bidikni gitade, Lok Sabha election-o susana gita ua an·tangni MLA ong·aniko watna nangkujawa indiba MP-na seokako man·ani ja·mansa MLA ong·aniko watna nangskagenchim.
Ampareen-ko Shillong seat-na aro Agatha-ko Tura seat-na party candidate dake seokani ja·man, Meghalaya a·dokni Lok Sabha seat damgnikon chena ka·dongenga ine NPP-ni dilgiparang parakatahachim.