EGH-o dolong damgniko oprake on·anga
U·IATTIMGIPAONI
WILLIAMNAGAR: East Garo Hills a·jao Rongon chiringni kosako metre 51.68 ong·e kabatgipa dolong aro Rongre chiring kosako metre 51.68 ong·e kabatgipa dolongko Mongolbar salo, a·dokni Chief Minister Conrad K Sangma, Tura-ni MP Agatha K Sangma, a·dokni Deputy Chief Minister Prestone Tynsong aro Williamnagar-ni MLA Marcuise N Marak, Nengmandalgre kal·chakramo dingtangmancha tom·bimonganiko ong·atanio oprake on·angaha.
Ia dolongrang baksana Nengmandalgre-oni Daribokgre (Mandalgre) ramaona kilometer 35 ong·gipa rama aro Cherangre-oni Sisobibra (Nengmandalgre-oni Gitokgre) ramaona km 7.820 ong·gipa ramakoba oprake on·angjolaha.
Rongre chiring kosako metre 51.68 ong·e kabatgipa dolongko rikna gita gimik gong lak 176.969 tangkarangko chame on·ahachim aro Rongon chiringni kosako metre 51.68 ong·e kabatgipa dolongko rikna gita gong lak 151.140 tangkarangko sorkari chamatskaahachim ine nikna man·a.
Ia rama jal·langrangko oprake on·angani somoio a·dokni Chief Minister, jinmana aganprakangengon, jolo namroro silroroaniko ra·bana gita ia gital rikgipa dolongrangara namen nangchongmotgipa ong·a ine parakangaha.
“Rama jal·ang gride maming namroro silroroani sokbana man·jawa, uni gimin rama jal·langrangara namen nangchongmotgipa ong·a,” ine Sangma aganaha.
PMGSY scheme-ni ning·o ga·akgipa ramarangko tarina cholrangko on·ahani gimin Tura-ni MP Agatha K Sangma-ko mittelpilangengon, PMGSY-ni kamrangko chu·sokatanio Meghalaya a·dokba nambatsranggipa a·dokrangoni damsa ong·enga ine Chief Minister parakataha.
Ia tom·anio a·dokni Deputy Chief Minister Prestone Tynsong-ba jinmana aganprakengon, ia rama jal·langrangko tarianichi ia jolo donggipa manderangna pilakni gitan namgni ong·gnok aro sorkari, songantionan namroro silroroaniko sokatna gita rakbee kamko ka·enga ine parakataha.