U·IATTIMGIPAONI
SHILLONG: Meghalaya State Commission for Women (MSCW)-ni gital chairperson-ko da·o adita salrangni gisepon songna man·gnok ine Mongolbar salo, a·dokni Social Welfare Minister Paul Lyngdoh parakataha.
Iani bidingo kobor ra·timgipa manderang baksa agangrikengon, MSCW-ko dilna gita uamang nambatgipa mandekosa seokna nangnikengani gimin search committee-ni recommend ka·atgipa sakbri manderangni gimin name niengkua ine Lyngdoh parakataha.
“Ia sakbri manderangoniko seokani ja·man chinga Cabinet-o ra·chakna gita watatkugen. Anga bebera·a iako da·o Cabinet-ni changgipin tom·anion seokna man·gnok,” ine a·dokni Social Welfare Minister aganaha.
MSCW-ni gitcham chairperson Phidalia Toi, June jao kam watangaonin gital chairperson-ko songna man·kujaengachim.
Da·o ong·enggipa MSCW, 2024 bilsini December jaon bon·na siengahani gimin gital chairperson-na seokako man·gipa mande, bilsisanasan office-o kamko ka·na man·aignokchim.
Batanggimin changrango MSCW-ni chairperson-ko sorkari, dilgiparang baksa nangrimgipa manderangonikosa seokronga ine matnanganirang dongani gimin gital chairperson-ko politics-o jak donggipa manderangonikode seokjawa ine adita salrangna skangsan Social Welfare Minister parakatahachim.
Lyngdoh-ni aganani gitade, MSCW chairperson-ni kamara namen mongsonggipa ong·a aro ia kamna search committee, mande sakbrini bimingrangko seoke donmanahachim.