U·IATTIMGIPAONI
TURA: West Garo Hills a·jani Gambegre C&RD Block ning·o donggipa Chigitchakgre songo, bija jilanichi bija bitchi man·aniko bariatna gita CMSDF-ni ning·o ia songna gong lak 10 tangkarangko dakchake on·gen ine Mongolbar salo, ia songko ‘Bee Village’ ba Bija Song ine parakangani ja·man a·dokni Chief Minister Conrad K Sangma parakataha.
Chigitchakgre songko ‘Bee Village’ ine parakna gita tom·aniko ong·atanio a·dokni Chief Minister baksana Babelapara-ni MDC Rakesh A Sangma, West Garo Hills a·jani Deputy Commissioner Jagdish Chelani, dingtang dingtang department-ni official-rang aro songni manderangba bakko ra·angtokaha.
Ia tom·aniko ong·atanio a·dokni Chief Minister, jinmana aganprakangkuengon, Chigitchakgre songo bija jile man·enggipa bija bitchirangko botolrango chipna, bija bitchirangko mesokna aro ia songko ‘Bee Village’ ine gipin biaprangoni manderangko salbana gita sorkari pilak nanga dakchakanirangko on·anggen ine ku·rachakaniko on·angaha.
Meghalaya a·doko bija jilani kamrangko tang·doatna gita a·dok sorkarini a·bachengatgipa Apiculture Mission-ni bidingo aganangengon, ia Mission-ni gnigipa bako sorkari, bija bitchirangko ong·katatna aro tarina gita pilak nanga dakchakanirangko on·enga ine Chief Minister parakataha.
Chigitchakgre songko ‘Bee Village’ ine parakanichi gipin biaprangoni manderangko ia songona salbana dakchakgen aro ian songni manderangna dingtang dingtang janggi tangani cholrangko on·na dakchakani ong·skagen ineba ua aganaha.
Ia tom·anio ua, bading chiwalanirango gisik nanggipa manderangko dakchake on·na sorkarini a·bachengatgipa CM-Elevate program-ni gimin talate on·angengon, an·tangtangni bading chiwalanirangko a·bachengatna gita ia program-ni namgniko ra·china gita jolni manderangko didiangaha.
