U·IATTIMGIPAONI
BAGHMARA: South Garo Hills a·jao ma·mong sorkarini ra·gatgipa scheme-rangko jako ra·e kam ka·aniko nipilna gita Mongolbar salo, Tura-ni MP Agatha K Sangma, District Development Coordination & Monitoring Committee (DISHA)-ni tom·aniko Baghmara-ni New Circuit House Conference Hall-o ong·atangaha.
Ia tom·anio dingtang dingtang department-rangni scheme-rang nipilangani ja·man aro ia scheme-rangko chu·sokatanio chagrongna nangenggipa neng·nikanirangko knatime ra·angani ja·man Tura-ni MP, dingtang dingtang department-ni officer-rangna aganprakengon, ia tom·aniko chu·sokgipa ong·atahani gimin South Garo Hills a·jani officer-rangko mittelpilangenba, dingtang dingtang scheme-rangko chu·sokatna gita je nangnikanirangkon officer-rang aganahachim, uarangko ma·mong sorkarina u·iatskagen ine ku·rachakaniko on·angaha.
An·tangni gadango ua mai dakgipa dingtanganirangko ra·bana man·gen, ua pilak kamrangkon chu·sokate on·na gitaba ia tom·anio Sangma parakataha.
Iana skang, South Garo Hills a·jani Deputy Commissioner S Awasthi, tom·anio bak ra·giparangna rimchaksoani kattarangko aganangengon, DISHA-ni tom·aniko ong·atahani gimin Tura-ni MP-ko mittelpilangenba, ian South Garo Hills a·jao dingtang dingtang scheme-rangko nambate chu·sokatna namgipa chol ong·enga ine parakangaha.
Ia tom·anio Meghalaya a·dokni Education Minister Rakkam A Sangma aro dingtang dingtang department-ni officer-rangba bak ra·angaha.
