U·IATTIMGIPAONI
TURA: West Garo Hills a·jani Rajabala jolrango Fire Service Station dongkujaengani a·sel wa·al kamani somoirango songni nokni manderang, bang·en noksan ong·atako man·rongna nangenga ine All Meghalaya Minority Students Union (AMMSU) parakatenba, Rajabala jolrango songdongenggipa manderangni namgnina Fire Service Station-ko kulichina gita a·dokni Director General of Police (DGP)-ko didiataha.
AMMSU-ni president Nur Islam-ni parakatani gitade, bilsiantian Rajabala jolrango wa·al kamanichi jolo songdongenggipa manderang, an·tangtangni nok-jamrangko aro dingtang dingtang gam-jinrangko gimaatna gita nangrongenga aro ia pilakan Rajabala jolo Fire Service Station dongkujani a·selba ong·engachim.
“Ia jolo sepangbatgipa fire service station, Rajabala-oni kilometer 20 chel·ao donggipa Phulbari-osa donga aro Rajabala jolrango wa·al kamgenchimoba indita chel·aoni wa·al kimitgipa garirang ta·rakede sokbana man·rongjani gimin bang·a changon manderangni nok-jamrang aro ma·manti gam-jinrangko chu·gimik wa·al kame galronga,” ine AMMSU-ni president parakatenba, ia jolrango songdongenggipa pilak manderangni namgninan Rajabala-o fire service station-ko kulichina a·dokni DGP-ko didiataha.