U·IATTIMGIPAONI
SHILLONG: Re·baengggipa 2024 bilsini Lok Sabha election-o NPP-ni candidate ong·e Shillong Parliamentary constituency-o susana tarisamsoengahaon, adita bilsirangna skang Education ‘scam’-o uni jak dongpaaniko chol ra·e gipin dolni candidate-rang uko galonna jotton ka·gen ine agananiko NPP-ni dilgipa aro Cabinet Minister Ampareen Lyngdoh jegalatenba, da·o dipet kacharian uko dosi chankujani gimin darangba uko dos donga ine aganna man·jawa ine parakataha.
“Ia case-ko da·oba kachario bichal ka·engkua aro da·o dipet anga dos donga ineba kachari rai on·kuja. Uni gimin darang political dolrangan angko dosi donggipa gita mesokjachina,” ine Lyngdoh aganaha.
Jeko kachari rai on·gen uko ra·chakna kusi ong·aigen ine janapatengon, “Kakketan chegipa ong·aigen aro anga an·tangba kakket ong·en chadengkuaigen. Kakketko pilakan nikna man·aigen, uni gimin iana agrede anga agandapjawa,” ine NPP-ni dilgipa parakataha.
Lyngdoh-ni aganani gitade, kachario dos donga ine sakkirang baksa rai on·kujaskal darangkoba dosi ine channa man·ja.
“Jeba jekona aganna man·aia indiba anga an·tangan nama nama kamrangko ka·engani gimin maming dakeba kenna nangani dongja. Kachariona re·angoba maiko agangrikenga anga ma·sienga. Ang baksa susana sienggipa manderang pilakkon anga susana tarienga,” ine ua aganaha.
Mikkang bilsini Lok Sabha election-ni bidingo janapatengon, NPP Shillong Parliamentary seat-ko chena gita ku·cholsan kamko ka·enga aro ia seat-ko chena ka·dongenga ine Lyngdoh parakataha.
Tura-ni MP Agatha K Sangma-ni kamrangko toe janapatengon, salgro salaram a·dokrangona aro Tura parliamentary constituency-na ra·bagipa dingtang dingtang project-rango pangchakesa ua kamrangko ka·soenga ine East Shillong-ni NPP MLA parakataha.
