U·IATTIMGIPAONI
TURA: South West Khasi Hills a·jani Khonjoy songo ru·uta bilsirangna tarichipgija donenggipa ramarangko tarichina gita A·chik Holistic Awakening Movement (AHAM) SWKH zone, a·dokni Deputy Chief Minister aro PWD (Roads) Minister Prestone Tynsong-na sedoataha.
SWKH a·jani Khonjoy jolrango tarichipgija gale donenggipa ramarangko tarichina didiatengon, Chibak-oni Waikut-ona km 14 ong·gipa PWD rama, Khonjoy-Moheshkola-oni Majisora songona km 10 ong·gipa PWD rama, Rongdanggai-Moheshkola PWD ramaoni Gilagora songona km 8 ong·gipa rama aro Rongdanggai-Moheshkola PWD ramaoni Koraibari songona km 10 ong·gipa ramarangko ta·raken tarie on·china AHAM SWKH zone, a·dokni Deputy Chief Minister aro PWD Minister-ko didiataha.
Khonjoy songo police station dongkujaengani a·sel jolo songdongenggipa manderang naljokani gri ong·na gita nangenga ineba AHAM SWKH zone, Khonjoy songo police station damsako kulie on·china Deputy Chief Minister-ko didiataha.
AHAM-ni parakatani gitade, Khonjoy aro iani wilwilao donggipa dingtang dingtang songrango manderangni jelbra jelsuani da·o batrorobaengahani gimin ong·gija dakgipa kamrangkoba nikna man·rongengahachim.
“Khonjoy songo police station-ko kuligenchimode ian ong·gija dakgipa manderangko champenganisan ong·aigija jolo songdongenggipa manderangna naljokanirangko on·na dakchakaniba ong·gen,” ine AHAM SWKH zone-ni dilgiparang parakataha.
