U·IATTIMGIPAONI
Tura: Persons with Disabilities International Day-ko ia sal da·al Robibar salo ga·akni gimin mijal salni bako Tura sepang Danak-gre Education Monfort Centre-o maniaha. District Medical & Health Office, Tura, District Legal Services Authority-ni official-rang, Staff aro Monfort Centre for Education-o poraigipa chatro-chatri-rang aro District-oni be·en-ni gita bilgri-jakgri mande-rang aro uamangko nirok-simsakgiparang maniani tom·ao dongpaaha.
Programme-ko West Garo Hills, District Social Welfare Office, District Legal Services Authority (DLSA) aro Monfort Centre for Education, Tura baksa nangrime “United in Action to Rescue and achieve the SDGs for, with and by persons with disabilities” dongimin ja·pang-kattao pangchake ong·ataha.
District Medical aro Health Officer, Tura Dr. B Debbarma Chief Guest ong·e tom·ao aganao be·eno bilgrianiko man·gipa manderangni bil-rengsi-rangko aro nama janggi tanganiko nambatatna ia salko on·kangaha. Songsal-na uamangni kam ka·ani-rangko aro chu·sokani-rangko maniengon be·eno bilgrianiko man·gipa manderangna apsan chol-rama aro namgnirangko on·a mongsonggipa ong·a-niko aro uamangni nam-gnina dingtang dingtang scheme-rangni ning·o bang·a tangka-paisani gita dakchakaniko India aro a·dok sorkarirangni on·-enganiko ua agan-parakaha.
Maming champengani gri songsalo uamangba apsan bakko ra·na man·gen uni gimin ia be·eno bilgri-gipa manderangna apsan cholrangko on·a nang-engani gimin awareness-rangko dakna ia salko maniaha ine Tura-ni District Social Welfare Officer, Silje A Sangma aganaha. Maniani ja·pang-kattako janape ia be·eno bilgrigipa manderangna a·gilsako nambatatna sakantian ku·cholsan kamko ka·na nanggen. Sorkarini on·eng-gipa tangka-paisani gita dakchakaniko man·a ia be·eno bilgrigipa mande-rang Disability Certificate, Aadhar Number aro gipin nanggipa lekkarang dong-na nanggen, ua aganaha.
A·bachengao District Medical & Health Office, Tura-oni Medical Team programme-o be·eni gita bilgrianiko man·gipa manderangko check up ka·e on·angaha.
