U·IATTIMGIPAONI
SHILLONG: Khasi aro Garo ku·sikrangko Constitution-ni Eighth Schedule-o napatchina gita a·dokni manderang dabitokengoba, ia ku·sik minggniko Eighth Schedule-o napatama napatjawa, da·o dipet Ministry of Home Affairs (MHA)-ni gita maming ku·rachakanirangko on·skakujaenga.
Khasi aro Garo ku·sikrangko Eighth Schedule-o napatchina dabienggipani bidingo Hynniewtrep Achik National Movement (HANM)-na aganchakaniko on·atengon, da·o dipet Eighth Schedule-o napatgimin ming 22 ku·sikrang donga aro Khasi, Garo ku·sikrangko man·chape dingtang dingtang ku·sikrangkoba Eighth Schedule-o napatchina dabianirang dongkuenga ine MHA-ni deputy secretary P Venukuttan Nair parakataha.
Ku·sikrangko Constitution-ni Eighth Schedule-o napatna niamrangko donanio MHA-na namen man·dikani ong·a ineba Nair parakataha.
Nair-ni parakatani gitade, 1996 bilsio Pahwa aro 2003 bilsio Sitakant Mohapatra committee-rang, Eighth Schedule-o ku·sikrangko napatna gita niamrangko tarina jotton ka·ahaoba chu·sokgipa ong·na man·jahachim.
“Gipin ku·sikrangkoba Eighth Schedule-o napatchina nanganirangko India sorkari ma·sichakenga aro iani giminsa iandakgipa mol·molanirangko nina nangao ga·akenga,” ine MHA, HANM-na seatgipa chittio parakataha.
Re·anggipa November jaosan HANM-ni membor-rang, New Delhi-ni Jantar Mantar-ona re·angenba, ILP-ko on·china, Khasi aro Garo ku·sikrangko Eighth Schedule-o napatchina aro Assam-Meghalaya a·dokni simarango ru·uta bilsirangna namatchipna man·jaenggipa neng·nikanirangko namatchina dabie, jingjengatanirangko dakangahachim.
Assam aro Meghalaya a·dokni simarango ong·enggipa obostarangko namatchina mol·molatgipana aganchakaniko on·atskaengon, ian Central State Division-ni ning·osa ga·akengani gimin iako uamangona watatskaenga ine MHA parakataha.
Indake ong·genchimoba, HANM-ni parakatani gitade, Meghalaya a·doko ILP-ko ra·gatchina dabienggipani giminde MHA maming aganchakanirangko on·atskajaha.
Meghalaya a·doko ILP-ko ra·gate on·kujaskal HANM, dingtangmancha anti-infux operation cell-ko songe kam ka·anggen ineba HANM-ni president Lamphrang Kharbani parakataha.