U·IATTIMGIPAONI
SHILLONG: Da·al Sombar salni bako United Democratic Party (UDP)-ni mongsonggipa tom·aniko ong·atna siengani gimin re·baenggipa 2024 bilsio ong·atna sienggipa Lok Sabha election-naba candidate-rangko seokangjolnaba gnang.
UDP-ni general secretary Jemino Mawthoh-ni kobor ra·timgiparangna parakatani gitade, Shillong aro Tura Lok Sabha seat-rango susaani aro ia constituency damgnina candidate-rangko seokani bidingo chanchirimna gita Sombar salo, UDP-ni mongsonggipa tom·aniko ong·atenga.
Ia tom·anion candidate-ni bimingrangkoba tik ka·jolgenma ine sing·anina aganchakaniko on·angengon, “Chingni tom·anio chinga pilak nangchongmotgipa kamrangkon tik ka·jolanggnok,” ine Mawthoh parakataha.
Apsan salon, Regional Democratic Alliance (RDA)-o bak ong·enggipa dolrang baksaba tom·e, election-o susaani gimin chanchianggen ineba ua aganaha.
UDP-ni bang·bata dilgiparangan, Hynniewtrep Youth Council (HYC)-ni gitcham president Robertjune Kharjahrin-na party tikit on·aniko nangniktokenga ine kobor on·gipani bidingo janapatengon, ia election-o susana gita adita sak manderang UDP-ni tikitna dorgasto galaha indiba iani bidingo UDP-ni dilgiparangsa chanchie ja·kuko de·anggen ine UDP-ni general secretary parakataha.
“Da·o dipetde iani bidingo anga mamingkoba aganna man·kujawa maina UDP-ni state election committee, UDP-ni chubata gadango donggipa dilgiparang baksa asonge chanchirimani ja·mansa iani bidingo tik ka·anggen,” ine Mawthoh aganaha.
UDP-ni tikitna dorgasto galenggipa sakgittam manderangara, HYC-ni gitcham president Robertjune Kharjahrin, Khasi Authors Society-ni president KL Nonglait aro UDP-ni gitcham MLA PT Sawkmie ong·achim.