U·IATTIMGIPAONI
SHILLONG: Meghalaya a·dokni gitcham Chief Minister aro Trinamool Congress (TMC) parliamentary party-ni dilgipa Dr Mukul Sangma-ni ong·katna miksongenggipani bidingo mamingkoba ma·sija ine Sombar salo, TMC-ni state president Charles Pyngrope parakataha.
“TMC-oni ong·katna miksongenggipani giminde angna ua (Mukul) mamingkoba aganna dongkuja. Iani bidingo anga unbaksa an·tangan agangrikgen. Chinga pangnan agangrikrongaiani gimin ua TMC-oni ong·katna miksongani donggenchimode angna aganaigenchim,” ine Pyngrope aganaha.
MLA ong·enggipa membor-rang doltangko wate katgenchimode pangnan party-na nangchakeanide dongaia ineba ua aganaha.
“Dr Mukul Sangma gita dakgipa mande doltangko wate katgenchimode uan party-na namjabata. Da·o dipetde uni ong·katna miksonganirangko anga an·tangde knasoa dongkuja. Politics-ni gita obostarang dingtangaiani giminde ua mande, party-tangko wate katgen ine aganna man·jawa,” ine TMC-ni state president, kobor ra·timgiparangna parakataha.
Pyngrope-ni aganani gitade, mandeni dakbewalko niaride badiaba MLA, party-tango dongna sikjaengaha ine aganna man·jawachim.
“Assembly election-o chinga kraa gita seat-rangko chegenchimode manderangni gisepo iandake chanchichipanirang ong·katjawachim. Assembly election-o TMC name dakna man·jahani a·selsa iandakgipa obostarangko chagrongna nangenga,” ine ua aganaha.
Meghalaya a·doko TMC-ni kamrangko Kolkata-onisa dilgiparang nirokenga ine agananiara kakket ong·ja ineba Pyngrope parakataha.
“TMC-ni state president ong·e Meghalaya a·dokode angasa kamrangko nirokenga,” ine ua aganaha.
TMC-ni state vice president George B Lyngdoh-ni kam watani gimin janapatskaengon, ua dingtang cholrangko niskaengani giminsa uni kam watani chittiko ua ra·chakna nangaha ine TMC-ni state president parakataha.
Meghalaya a·dokni Lok Sabha constituency-rango candidate-rangko susaatani bidingo sing·anina aganchakaniko on·angskaengon, Lok Sabha election-na tarisamsona gita da·o dipet uamang TMC-ni general secretary Abhishek Banerjee-ni maming u·iatanirangko man·soa dongkuja indiba gipin a·dokrango ong·atenggipa election-rang matchotahani gimin da·o bakan iani bidingo ma·sina man·gnok ine Pyngrope aganaha.