U·IATTIMGIPAONI
SHILLONG: Sombar salo a·dok sorkari, National Highways & Infrastructure Development Corporation Ltd (NHIDCL)-ni jako ra·e ka·enggipa project-rangko nipilna gita tom·aniko ong·atangenba, rama jal·langrangko tarianio contractor-rang maidakgipa neng·nikanirangko chagrongna nangenga, uarangko nirokjringchina gita PWD aro dingtang dingtang department-ni officer-rangko ge·etangaha.
Ia tom·anio dingtang dingtang department-ni officer-rang, NHIDCL-ni official-rang aro contractor-rangba dongpae bak ra·angaha aro tom·a matchotani ja·man kobor ra·timgipa manderang baksa agangrikengon, ia tom·anio NHIDCL-ni jako ra·e ka·enggipa pilak project-rangkon sorkari niangaha aro contractor-rangna kamrangko matchotatna gita dingtangmancha somoiko donchina official-rangna ge·etaniko on·aha ine Chief Minister parakataha.
“Rama jal·langrangko tarianio contractor-rang mai dakgipa neng·nikanirangko chagrongna nangenga, uarangni giminba chinga sing·sandie ra·aha aro iano pangchake, contractor-rangni neng·nikanirangko namatchina gita officer-rangko ge·etaha. Ian kamrangko ka·ani somoi ong·engahani gimin somoirangko indin bon·atjana gita chinga da·o kamrangko nirokjringgnok. Ia tom·anio NHIDLC-ni jako ra·e ka·enggipa pilak kamrangkon chinga nipilangaha,” ine Sangma aganaha.
Chief Minister-ni parakatani gitade, ia tom·ani konta gittammang ong·aha aro chu·sokgipaba ong·aha.
Ia tom·aniko ong·ate official-rang aro contractor-rang baksa chanchirimanichi pilak project-rangkon nambate matchotatna ka·dongenga ineba ua aganaha.
“Kamrangko ka·anio basakobade a·arangko ra·anio, buring bolgrimrango donggipa bol wa·arangko den·na nanganio aro uandakgipa dingtang dingtang neng·nikanirangko chagrongna nangronga aro da·o ia pilak neng·nikanirangko nirokchina gita official-rangna ge·etaniko on·manahani gimin mikkangchide kamrangko nambate ka·na man·gnok,” ine Chief Minister aganaha.
Chief Minister-ni parakatani gitade, a·dokni mongsonggipa rama jal·langrang, jekai Nongstoiñ-Wahkaji rama, Ranikor-Nonghyllam-