U·IATTIMGIPAONI
SHILLONG: Meghalaya Assembly-ni gital building-ko re·baenggipa 2024 bilsini July ba August jani gisepo matchotnaba gnang ine Mongolbar salo, Meghalaya Assembly-ni Speaker Thomas A Sangma, Mawdiangdiang-o rikenggipa gital Assembly building-ko niangani ja·man, kobor ra·timgiparangna parakataha.
Gital rikenggipa Assembly building-ko niangani ja·man ua dingtangmancha iani bidingo tom·e chanchirimanikoba dakangaha aro ia tom·anio Assembly-ni Deputy Speaker Timothy D Shira, Meghalaya Assembly-ni Commissioner & Secretary Dr Andrew Simons aro dingtang dingtang department-ni official-rangba bakko ra·angaha.
Official-rang baksa tom·e chanchirimani ja·man kobor ra·timgipa manderang baksa agangrikengon, ia gital Assembly building-ko ta·raken matchotatna gita sorkari rakbee kamko ka·enga ine Assembly Speaker parakataha.
Ia gital Assembly building-ko 2024 bilsini July ba August jao matchotna ka·dongsoenga ine janapatengon, Assembly-ni Autumn Session-ko ia gital Assembly building-on ong·atna miksonganirang donga ine Sangma parakataha.
“Da·al salni bako chinga dingtang dingtang department-rangko okame apsan chanchirimaha. Ia Assembly complex-o chirangko simsak nirokna gita chinga PHE department-ko okamaha, Assembly-ni wilwilao donggipa biaprangna Social Forest-ko aro unbaksana Arts & Culture, IT department, NIC aro uandakgipa dingtang dingtang department-rangkoba dingtang dingtang kamrangna okamaha,” ine Sangma aganaha.
Assembly building-ni dome ba protchongko gital dake taritaienggipani bidingo janapatengon, ia gital protchongko silgittangchi taridapenga aro ia gital protchong, ia jao ba mikkang bilsini January jaon sokbana siengahani gimin protchongko February jaoni chatna a·bachengate April jaode matchotatna ka·dongenga ine Assembly Speaker parakataha.
Ia gital protchongko IIT Guwahati aro IIT Roorkee-ni manderang name niangchenggen ineba Sangma parakataha.
