U·IATTIMGIPAONI
SHILLONG: Re·baenggipa 2024 bilsini January jao Tura-o ong·atna sienggipa Meghalaya Games-o chasong gitalni kal·susaanirang baksana a·doko songdongenggipa jatgittamni gitcham kal·susaanirangkoba ong·atanggen ine Mongolbar salo, a·dokni Chief Minister Conrad K Sangma parakataha.
Iani bidingo kobor ra·timgiparangna talataniko on·angengon, ia gittamgipa Meghalaya Games-o chasong gitalni kal·susaanirang baksana, Khasi, Jaintia aro Garo jatrangni kal·susaanirangkoba ong·atanggen ine Chief Minister parakataha.
Chief Minister-ni parakatani gitade, a·dokni chadamberang, Tribal-rangni gitcham kal·susaanirangko ma·sie ra·china aro Tribal-rangara pangnan kal·susaanirango bak ong·gipa jatrang ong·a ine gisik ra·ataniko on·na gita ia Meghalaya Games-o jatni kal·susaanirangkoba ong·atna tik ka·aha.
Ia Meghalaya Games-o bak ra·enggipa sak 3000 manderangko, dingtang dingtang biaprangonaba rimanggen aro ua jolni bidingo nambate ma·sie ra·na gita jolni chadamberang baksa agangrikna cholrangko on·gen ineba Sangma aganaha.
Meghalaya Games-ko a·dok sorkari, Fit India program baksa nangrimatna nangnikenga ineba Chief Minister aganaha.
Batanggimin bilsi 17-o Meghalaya Games-ko changgnisan ong·atengkua ine janapatengon, Meghalaya Games-ko da·ode bilsiantian ong·atronggnok aro changgipin Meghalaya Games-kode Nongstoin ba gipin a·jarango ong·atskana man·gnok ine Chief Minister parakataha.
