U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong parliamentary constituency-oni susana gita Khasi Authors Society (KAS)-ni president DRL Nonglait-ba United Democratic Party (UDP)-ni tikitna susaenga ine jangbingbanganirangko knasona man·engon, iako Nonglait an·tangan jegalatskaenba, ua Lok Sabha election-o susana miksonganirangba dongja ine talataniko on·angaha.
Nonglait-ni parakatani gitade, Shillong Parliamentary seat-oni susana gita ukoba UDP-ni tikitna susaenggiparangoni saksa ine songbadrango seanirangko ua nikaha indiba ua an·tangde changsaba UDP-ni tikitna dorgasto gala dongskajachim.
“UDP-ni adita sak dilgiparang aro membor-rangsa angona re·bae, UDP-ni tikitchi susachina angko mol·moleahachim indiba anga an·tangde UDP-ni tikitna dorgasto gala dongjachim,” ine KAS-ni president aganaha.
Nonglait-ni u·iatani gitade, Khasi ku·sikko Constitution-ni Eighth Schedule-o napatchina dabianirangko dakenba Delhi-ona re·bapilani ja·man ua UDP-ni dilgiparangko grongaha aro uamangni gisepo adita chanchirimani ja·man ua KAS-ni president-ni kamko watjana gita tik ka·ahachim.
“Da·o dipet anga KAS-ni president ong·e, Khasi ku·sikko Eighth Schedule-o napatchina dabidilengani gimin anga UDP ba badiaba political dolrangoni susana gita tikitna dorgasto galjawa,” ine Nonglait aganaha.
Ua 2025 bilsiona kingking KAS-ni president ong·kuengani gimin Khasi ku·sikko Eighth Schedule-o napatkujaskal ia kamko watna man·kujawa ineba Nonglait parakataha.