U·IATTIMGIPAONI
SHILLONG: Tura Lok Sabha constituency-ni MP ong·e kamko ka·anio Agatha K Sangma, ma·mong sorkarini bang·a scheme-rangkon sokate on·na man·jaha ine Meghalaya BJP-ni state president Rikman Momin-ni matnanganiko Agatha-ni adagipa aro a·dokni Chief Minister Conrad K Sangma jegalataha.
Ma·mong sorkarini dingtang dingtang scheme-rang, mongsongbate MPLAD scheme-ni bidingo BJP-ni state president, Tura MP-ni kamo suk ong·nikgijaniko parakahachim ine nikna man·a.
Agatha-ni kosako matnanganirangko jegalatskaengon, MPLAD program-ko sajinmani somoion Meghalaya a·dokosan ong·aigija, a·song gimikon NDA sorkari dontongatchengna tik ka·ahachim ine Chief Minister Conrad K Sangma talataniko on·angaha.
Jal Jeevan Mission aro PMGSY-ni kamrango Tura MP-ni chu·sokatgipa kamrangni gimin janapatengon, “MP-rangni daitoara ma·mong sorkarini bang·bea scheme-rangko chu·sokatanian ong·a aro Tura-ni MP-ba ia scheme-rangko chu·sokatanio mongsonggipa kamrangkon ka·aha,” ine Conrad aganaha.
MPLAD-na chamgipa tangka paisarangna baten namroro silroroani kamrangko Tura-ni MP ka·aha ine janapatengon, MP-rangni chu·sokate on·gipa kamrangni bidingo manderangna mesoke on·na nangengani gimin Chief Minister aganaha.
“A·dokona scheme-rang sokbaon, ua pilak kamrangkon chu·sokate on·aha aro ia kamrangko pilaknan nikchina mesokataha,” ine Conrad aganaha.