U·IATTIMGIPAONI
SHILLONG: Civil Defence & Home Guard-ni chang 61-gipa Raising Day-ko Budbar salo, Shillong songjinmani Mawdiangdiang-o donggipa Civil Defence Parade Ground-o maniangaha.
Civil Defence-ni bilsi 61 gapaniko manianio, a·dokni Civil Defence & Home Guards Minister Comingone Ymbon, mongsonggipa sokgipa ong·e jinmana aganprakangengon, Civil Defence aro Home Guards dolgnian rang·gitik a·sel ong·ani somoirango bang·en dakchakanirangko on·aha ine mittelpilangaha.
A·doko niam retirangko rakkianio aro dingtang dingtang kamrango ia dolgnian Meghalaya Police-naba bang·en dakchakanirangko on·aha ineba Ymbon aganaha.
Home Guard volunteer-rangna training-rangko on·anichi aro Disaster Management-ko man·chape Civil Defence-ni dingtang dingtang subject-rangni gimin training course-rangko on·anichi uamang songsalna dangdike on·enga ineba Civil Defence & Home Guards Minister parakataha.
Dingtang dingtang kamrangko ka·anio songni nokni dilgiparang, jekai Nokma, Dorbar aro uandakgipa manderangni dakchakanirangko ra·china gitaba ua department-ko didiangaha.
Ia tom·anio Civil Defence & Home Guards-ni Director General I Nongrang-ba jinmana aganprakangengon, department-o kam ka·giparang chu·ongjagenchimoba uamang, nangan somoirango manderangna dakchakanirangko on·na gita district aro state official-rang baksa nangrime kamrangko ka·enga ine parakataha.
