U·IATTIMGIPAONI
TURA: Meghalaya a·doko niam gri koela bikote salruraanirangko champengjaengani gimin NPP-chi dilenggipa MDA sorkarini kosako matnanganirangko nikna man·engon, South Garo Hills a·jani Nongalbibra jolrango niam gri koelarangko bikote, dingtang dingtang biaprango dane dontaiengaha ine Siju-Rongara constituency-ni gitcham MLA Rophul S Marak, Nongalbibra police station-ni officer-in-charge (OC)-na FIR ka·doangaha.
Marak-ni FIR-o parakatani gitade, Meghalaya a·doko niam gri koela bikotaniko Supreme Court aro Meghalaya High Court champengatmanahaoba da·o ia jolrango gital dake koelarangko niam gri bikotenba, Nongalbibra, Jadigittim, Ga·regittim, Darangdura aro uandakgipa samba jolrango koelarangko chimongengachim.
“Meghalaya a·doko niam gri koelarangko bikotani gimin Meghalaya High Court-o PIL No. 2 aro gipin PIL-rangba bangki dongkuenga aro indita case-rang matchotgija dongkuengon, Nongalbibra jolrango niam gri koela bikotani aro salruraaniko dontongkujaenga,” ine Marak, FIR-o parakataha.
Iani bidingo FIR-ko register ka·enba, sandirokanirangko dakchina aro niam gri koela bikote salruraani jak donggipa manderangni kosako rakgipa ja·kurangko de·china gitaba gitcham MLA, police-rangko didiataha.
