U·IATTIMGIPAONI
SHILLONG: Cholgri manderangna ma·mong sorkarini ra·gate on·gipa dingtang dingtang scheme aro namgnirangko Tura-ni MP Agatha K Sangma, sokate on·jaenga ine Meghalaya a·dokni Bharatiya Janata Party (BJP)-ni matnanganiko Sukrobar salo, National People’s Party (NPP)-ni dilgipa aro a·dokni gitcham minister James K Sangma jegalataha.
Sangma-ni parakatani gitade, Tura-ni MP Agatha K Sangma, Garo Hills-nasan ong·aigija Meghalaya a·dok gimiknan namgnirangko ra·bae on·ahachim aro iandake uni kosako matnanganiara maming pangchakani gri matnanganisan ong·aiachim.
“BJP-ni badia dilgipa iandake matnangaha anga ma·sija indiba ua Tura MP-ni kamrangko name nichengjahakon. Ma·mong sorkarini ra·gate on·gipa scheme-rangko nigenchimode ian a·dokni bang·a manderangonan sokahachim,” ine Sangma aganaha.
Manderangni kosako matnangnade namen altubea ine janapatengon, matnanganirang donggenchimoba pangnan kakketosa pangchakna nanga ine NPP-ni dilgipa parakataha.
Meghalaya a·doko pilak namroro silroroani kamrangko Garo Hills-onasa ra·angenga ine matnanganirangkoba James raken jegalataha.
“A·doko namroro silroroani kamrangko Garo Hills-onasan ra·angenga ine matnanganiara kakket ong·ja maina an·ching a·dokni pilak biaprangon namroro silroroaniko nikna man·engaha. NPP-chi dilenggipa sorkari, darangnaba mikkang niteani grisa kamko ka·enga,” ine Dadenggre-ni gitcham MLA aganaha.
Sangma-ni aganani gitade, batanggimin bilsirangode Garo Hills-ko nichanggalani a·selsa maming dingtanganiko nikna man·jahachim indiba da·ode Garo Hills-oba pilakni gitan namroro silrorobaenganiko nikna man·engahachim.
“Garo Hills-o da·osa dingtanganiko nikna man·engahani gimin manderang iako ong·gija chanchisretenga aro pilak namgnirangkon Garo Hills-ona ra·baenga ine ma·sisretenga,” ine Sangma aganaha.
Re·baenggipa 2024 bilsini Lok Sabha election-o Tura Parliament constituency-oni susaenggipa Agatha K Sangma-ni gimin janapatengon, ua Garo Hills-na bang·en kamrangko ka·ahani gimin ia chang election-oba seokako man·taiani cholrang bang·batenga ine James aganaha.
Sangma-ni parakatani gitade, re·baenggipa bilsini Lok Sabha election-na da·o Tura-ni MP ong·enggipa aro NPP-ni candidate Agatha K Sangma, campaign-rangko ka·na a·bachengaha aro dingtang dingtang biaprangona re·ange tom·anirangko ong·atengaha.
Tura MP-ni kamrangna mittelpile aganangengon, Garo ku·sikko Eighth Schedule-o napatchina dabiani somoio adita neng·nikanirangko chagrongna nangani somoioba ua, dingtang dingtang dilgiparang baksa Delhi-ona re·ange ma·mong sorkarini dilgiparangko grongedilaha aro ian uni a·dokna aro Garo Hills-ni manderangna on·kange kam ka·aniko mesokani ong·enga ine NPP-ni dilgipa parakataha.