U·IATTIMGIPAONI…
SHILLONG: State Fire and Emergency Services da·omitingo mikrake dongsoenga, maina singkarini somoio bang·a wa·al kam·e a·sel ong·anirang dongrongaha.
Jaa 2-ni ning·aon Shillong-o ge-2 dal·bea wa·ale kame a·sel ong·anirangko nikangna man·aha, uno nok aro dokan wa·al kamaniko nikangna man·aha.
Ia bilsini October jao Jail Road-ni Singhania Building-o dal·bea wa·al kamako nikangaha, jeon Fire aro Emergency service-rang mitam agency-rangni dakchakanichi kimitna salgni nangpilaha.
Mijao mangmang Luckier road-o donggipa flour factory-o namen dal·bee wa·al kamaha, indiba rasong gnange darangni janggian gimajaha, aro una agreba mijao mangmango Mawpat-o nok ka·maha.
Inspector General of Police (F&ES), Francis G. Kharshiing, Shillong Times baksa golpoanio agana, wa·al kamanirangra pangnan ong·kamgipa ong·ja, indiba nie ra·na man·ani gita singkarini somoirango indakgipa a·sel ong·anirangko nikna man·rongaha.
“Chinga mikrake tarie dongsoenga, indake wa·al kame a·sel ong·anirangra gital ong·ja, chinga antion changsa ba changgnide indakgipa a·selrangko chagrongaha,” ine ua agandapaha.
Agani gita, Fire aro Emergency Services (F&ES), a·dok sorkarini fire hydrant-ko jelbra jelsrugipa biaprango donna chanchianiko dakani chol dongaha, mongsongbate jinma manderangni bazar-rango aro fire department-ni namna mangija biaprango jedakode indakgipa a·sel ong·anio rang·san kam ka·na man·gen.
