U·IATTIMGIPAONI
TURA: Adita salrangna skang, South Garo Hills a·jani Krishi Vigyan Kendra (KVK), Scientific Advisory Committee (SAC)-ni changdokgipa tom·aniko South Garo Hills a·jani Warima songo donggipa Farmers Training Centre-o ong·atangaha.
Ia tom·aniko ICAR, ATARI, Zone VII-ni Principal Scientist Dr AK Singha aro Tura College of Community Science-ni Dean I/c Prof Dr Namita Singh dilangaha aro tom·anio West Garo Hills KVK-ni Senior Scientist & Head Dr Monica Suresh Singh, WGH KVK-ni SMS (Agriculture Extension) Dr Tarun Kr Das, NABARD-ni DDM Khelchandra Chongtham aro dingtang dingtang official-rangba bak ra·angtokaha.
Ia tom·anio SGH KVK-ni Principal Scientist aro Head Dr Athokpam Haribhushan, 2023 bilsini Annual Achievement Report aro 2024 bilsina Annual Action Plan-ko talate on·angan baksana South Garo Hills KVK-ni chu·sokatgipa kamrangni giminba talate on·angaha.
Ia tom·anio, ICAR, ATARI, Zone VII-ni Principal Scientist Dr AK Singha-ba jinmana aganprakangengon, South Garo Hills a·jana aiao inmanbegipa kamrangko ka·engani gimin KVK-ko mittelpilangenba, dingtang dingtang department-rang baksa nangrime, gama ge·ani kamrangko namdapatchina gita didiangaha.
