U·IATTIMGIPAONI
TURA: Ma·mong sorkarini a·bachengatgipa Viksit Bharat Sankalp Yatra (VBSY) program-ara, ma·mong sorkarini scheme aro namgnirangni gimin ma·sikujagijagipa aro iandakgipa scheme-rangko man·gijagipa songni manderangnasa ong·engani gimin ia program-ara ma·mong sorkarini scheme-rangko man·jaenggipa songni manderangko bak ong·atanisa ong·enga ine Robibar salo, Tura-ni MDC aro Meghalaya BJP-ni state vice president Bernard N Marak parakataha.
Marak-ni parakatani gitade, dingtang dingtang songni VEC secretary-rang aro block official-rang, ia VBSY program-ni bidingo songni manderangnade u·iatgija, je manderangan scheme-ni namgnirangko man·aha, uamangkosa ia program-rangona okamatenga ine songni manderang una u·iatahachim.
“VBSY program-de maming political dolrango bak donggipa manderangna miksonge ra·gatgipa program ong·ja indiba ian scheme-ni namgnirangko man·jaenggipa manderangni neng·nikanirangko namatna gita ma·mong sorkarini a·bachengatgipa program-sa ong·a. Je manderangkon ma·mong sorkarini scheme-rango watgalaha, uamangkoba biapon biming segatna nangachim. Ia VBSY program-ni ning·o medical camp aro awareness-rangkoba on·na nangachim indiba iarangko official-rang ja·rikbrejaenga. Ia VBSY program-rangko ong·atanio songni manderangko bak ra·atchina BJP-chi dilenggipa ma·mong sorkari ge·etahachim indiba road map-ko ja·manchakesa on·aha aro mitam biaprangode program-rangkoba bon·kamgipa somoion ra·galpilaha,” ine Tura MDC parakataha.
VBSY program-rangko ong·atengon, pangnan songni manderangko bak ra·atenba, uamangni neng·nikanirangko knatime ra·china aro ma·mongni scheme-rangko man·china gita pilak nanga dakchakanirangko on·china gitaba ua nodal official-rangko mol·molataha.
“VBSY program-o BJP-ni manderang maikoba dakchake on·na man·genchimode chingna je somoioba u·iatchina. Chingni membor-rang, block ge·antini VBSY program-rangon bak ra·enga aro chinga ma·mong sorkariona watatskana man·na gita chingna photo baksana report-rangkoba on·atenga,” ine Marak parakataha.