U·IATTIMGIPAONI
TURA: 2016 bilsio chi bananichi Dadenggre Sub-Division-ni ning·o donggipa Selsella Block-ni mitam songrango an·tangtangni gama ge·anirangko gimaatna nanggipa manderangna State Disaster Response Fund (SDRF)-ni ning·o chamatgipa tangka paisarangko Selsella Block-ni gitcham Agriculture Inspector Mominul Islam jakkalsretaha ine matnangenba, ia official-ni kosako Rajabala aro uni wilwilao donggipa songrangni gaonbura, Agriculture department-ni Director-na badi ka·doataha.
Iani bidingo Agriculture department-ni Director-na seachi badi ka·doatengon, 2016 bilsio chi bananichi gama ge·anirangko gimaatna nangahani a·sel Selsella Block-ni ning·o donggipa dingtang dingtang songrango game ge·e cha·enggipa manderang neng·nikanirangko chagrongna nangahani gimin Meghalaya sorkari, SDRF-ni ning·o tangka paisarangko chame on·atahachim indiba ia tangka paisarangko ua somoio Selsella Block-ni Agriculture Inspector ong·e kamko ka·enggipa Mominul Islam, game ge·e cha·gipa pilak manderangnade tikatgija an·tangtangni ma·drang mahari nanggipa manderangnasa on·aiahachim ine Rajabala songni gaonbura parakataha.
“Iani bidingo 2018 bilsini August 5 tarikon, ia officer-ni kosako ja·kurangko de·china badi ka·doangahachim indiba ia officer-ni kosako maming ja·kurangko de·chipjaha aro 2020 bilsini June 30 tarikoba, ia a·selni bidingo inquiry dakchina Selsella Block-ni BDO-na ge·etaniko on·atahachim indiba maming ja·kurangko de·chipjaha,” ine Rajabala songni gaonbura, Agriculture department-ni Director-na badi ka·doataha.
Indake ong·engon, iani bidingo gital dake sandirokanirangko dakenba, kosako janapgimin Agriculture Inspector-ni kosako nanga gita ja·kurangko de·china Rajabala songni gaonbura, Agriculture department-ni Director-ko didiataha.
