U·IATTIMGIPAONI
SHILLONG: Shillong songjinmani Them Iew Mawlong-oniko Shillong Municipal Board-ni sambao donggipa biapona Harijan Colony-o songdongenggipa manderangko apjitanio acre 1.4 a·arangko on·dapna sorkarini tik ka·aniko matnangenggipa dolrangara politics kal·na jotton ka·enggiparangsan ong·aia ine Sombar salo, a·dokni Deputy Chief Minister Prestone Tynsong parakataha.
Them Iew Mawlong-oniko Shillong Municipal Board office mikkango donggipa biapona apjitatanio Harijan Colony-ni nokdangrangna acre 1.4 a·arangko on·dapna gita adita salrangna skangsan a·dok sorkari, Harijan Panchayat Committee (HPC) baksa tom·e agangrikanio ku·rachakaniko on·angahachim.
Iana skangba, Harijan Colony-ni manderangna ia apsan biapon acre 2.14 ong·gipa a·ako sorkari on·ahachim aro da·o acre 1.4 a·arangko on·dapengahani gimin Harijan Colony-ni nokdangrangna sorkarini on·enggipa a·arang gimik acre 3.6 ong·engahachim.
Harijan Colony-ni manderangna acre 1.4 a·ako on·dapna tik ka·ahani gimin a·dok sorkariko matnangatskaengon, ia manderangara sorkario kam ka·enggipa manderangsa ong·genchimode maini gimin uamangna a·arangko on·dapna nangkuenga ine Voice of the People’s Party (VPP)-ni dilgipa Adelbert Nongrum sing·doatskaahachim.
Iandake VPP-ni matnanganina aganchakaniko on·angskaengon, ia manderangara maming kakketko ma·sichenggija politics kal·na gita matnange roaigipa dolrangsan ong·aia ine Deputy Chief Minister parakatskaaha.
“Ian kakketko ma·sichenggija politics kal·na jotton ka·aniko mesokanisan ong·aia. Ia manderang, Harijan Colony-o badita sak songdonggipa manderang donga ukon ma·sichengkuja. Uni gimin anga iandakgipa kattarangni bidingo jera ra·grike an·tangni somoiko bon·atna sikja,” ine Tynsong aganaha.
Acre 1.4 a·arangko sorkari, Harijan Colony-ni manderangnade pakwate on·jawa indiba Shillong Municipal Board (SMB)-nasa pakwate on·anggen ineba ua talataniko on·angaha.
“Ia a·arangara Harijan-rangni ong·jawa indiba Shillong Municipal Board-nisa ong·aigen. Iani bidingo talbate ma·sina nangnikengode angko re·bae grongechina. Manderangko na·simang dilsretjana gita anga na·simangna ia gimikkon talate on·gen,” ine Deputy Chief Minister parakataha.
