U·IATTIMGIPAONI
SHILLONG: Da·o Lok Sabha election ong·na sepangbataiengahani gimin Voice of the People’s Party (VPP) aro National People’s Party (NPP)-ni gisepo matnanggrikanirangko nikna man·taiengahaon, gitcham dilgiparangan gital political dolko bikote sorkario dingtanganiko ra·bana ku·rachakaniara ‘gital botolo gitcham chuko rusrea’ gitasan ong·aia ine VPP-ko NPP matnangataha.
Meghalaya a·doko gipin political dolrang gita ong·gija tangka paisa jakkalsretani grigipa sorkariko chalaina VPP-ni dilgiparang ku·rachakengachim ine nikna man·a.
Iani bidingo kobor ra·timgipa manderang baksa agangrikengon, “Re·baenggipa bilsini Lok Sabha election-o VPP, skanggipa changna susana sienga aro ia gital political dolara sorkariko chalaie nikugijagipa dolsan ong·aia ine an·ching pilakan ma·sia. Ia gital political dolara, ‘gital botolo gitcham chuko rusrea gitasan ong·aienga’” ine Sombar salo, NPP-ni ku·wattimgipa aro a·dokni Cabinet Minister Ampareen Lyngdoh parakataha.
Lyngdoh-ni parakatani gitade, VPP-ni dilgiparangara dingtang dingtang dolrango kamko ka·gipa apsan dilgiparangan ong·a aro uamang, an·tangtangni gitcham dolrango chu·sokgijanirangko aro chu·sokanirangko dai ra·na nanggipa manderangan ong·a.
“Chinga iandakgipa neng·nikanirangko chagronggen ine na·simang agana ong·ode chinga neng·nikanirangko chagrongnaba gnang, indiba VPP gita dakgipa gital dolni pilak dilgiparangan gipin dolrang baksa jak donggimin ong·a ine an·ching gualna gita nangja,” ine ua aganaha.
VPP dolara, batanggimin somoirango dingtang dingtang political dolrango membor ong·anggipa Nongkrem-ni MLA Ardent Miller Basaiawmoit-chi dilenggipa dol ong·achim aro ia dolko Meghalaya Trinamool Congress (TMC)-ni ‘Team-B’ ine dingtang dingtang dilgiparang matnangtokahachim.
Re·baenggipa 2024 bilsini Lok Sabha election-o VPP dolba susana gita tarisoengahachim aro Shillong Parliamentary seat-oni susana gita VPP-ni dilgipa Ricky Syngkon-ko candidate dake parakmanahachim.
Shillong Parliamentary seat-o a·dokni Cabinet Minister Ampareen Lyngdoh-ba NPP-ni candidate ong·e susaskaengachim.
