U·IATTIMGIPAONI
TURA: Garo Hills-o man·gipa meseng bolam biterangko mesokna gita Sombar salo, North Eastern Hill University-ni Horticulture department, New Delhi-ni ICAR-NBPGR baksa nangrimenba, ‘Citrus Biodiversity Fair & PGR Conservation Awareness’-ni bidingo game ge·e cha·giparangna Capacity Building Program-ko ong·atangaha.
Ia program-ko ‘Viksit Bharat@2047’-o pangchake NEH scheme-ni ning·o ong·atangaha aro ia program-ko ong·atanio USA aro France a·songni Scientist-rangba bakko ra·angaha.
Ia program-ko ong·atanio NEHU-ni Vice Chancellor Prof PS Shukla, mongsonggipa sokgipa ong·e jinmana aganprakangengon, salgro salaram a·dokrangara ma·manti bolam biterangko ge·na namen namgipa biap ong·a aro ia jolrango gama ge·anirangko namdapatna gitade namgipa bosturangkosa nangenga ine aganangaha.
Garo Hills-o a·arang rurongengani a·sel meseng biterang mikkangchi gimaani cholrang donga ine kenchakaniko janapatengon, iandakgipa meseng biterangko ripinge rakkina nangengani giminba NEHU-ni VC aganangaha.
Ia program-ko ong·atanio dongpae jinmana aganprakanggipa gipin manderangara, ia program-ni Organising Secretary Prof CP Suresh, New Delhi ICAR-NBPGR-ni Principal Scientist Dr SK Malik, Umiam-o donggipa ICAR-NBPGR-ni Scientist Dr Subarna Hajong, USA a·songo donggipa University of Florida-ni Jr Professor Fred Gmitter, NEHU Tura Campus-ni Campus Director Prof Sujatha Gurudev aro gipinrang ong·a.
Ia program-ko ong·atanio Garo Hills-o game ge·e cha·enggipa sak 100-na baten manderang bakko ra·angtokaha.