U·IATTIMGIPAONI
TURA: South Garo Hills district-ni Rompa A·sim A·kingna, Nokmako songchina gita joltangni Social activist Geneth M Sangma, GHADC-ko didiaha, jeon skangni Nokma Sulonsing A Sangma-ni siani ja·manonin Nokma songtaikujachim.
GHADC Deputy CEM, Nikman Ch Marak-ko mol·mole seatgipa chittio janapatani gitade, je copy-kon West Garo Hills Deputy commissioner-naba on·ahachim, A·kingni ning·o songdong-a·chagiparang pilakan Nokma dongjae neng·nikanirangko man·tokenga, indake A·king Nokma dongjani a·selan, EPIC, Birth Certificate, Caste Certificate tarianio, Loan Subsidy-rangna dorgasto galanio ugita gipin nanganirangna kam ka·anio manderang neng·nikaniko man·tokenga ine Sangma aganaha.
Indakeba nikatna man·a je, adita salrangna skango, dolgni manderang, chong·motan sianggipa Nokmani jikgipa aro maharirang aro Me’cheng mahari-ni ning·ogipa dolsa Committee-ni gisepo Nokmani bilko a·kanggriktokengachim, jeon uamang dolgnini gisepo dolsa dolgipinni kosako FIR-rangko on·griktokpilaha.
Unigimin ia a·kingni kosako bilko a·kanganirangko bon·atna gita saksa dilgiparangko seoke on·china ine Sangma, GHADC-o mol·molaha.