U·IATTIMGIPAONI
SHILLONG: Meghalaya a·doko class 1-oni class 10-ona NCERT-ni textbook-rangko ra·gatna sorkari miksongengon, MBOSE-o NCERT-ni textbook-rangko ra·gatgija a·doktangni curriculum aro textbook-rangkon namdapatchina gita Meghalaya Trinamool Congress (TMC)-ni chadambe dolko dilgipa Richard Marak didiataha.
Marak-ni parakatani gitade, Meghalaya a·doko chatro chatrirangni nanganirangko aro lekka porako namdapatna gita a·doktangni curriculum aro textbook-rangkosa namdapatna nangengachim indiba a·doktangni curriculum-rangko namdapatani pal, NCERT-ni textbook-rangko ra·gatna miksonganiara a·dokni Education Minister aro MDA sorkarini, kamtangoni ‘gele katna’ jotton ka·aniko mesokani gitasa ong·skaengachim.
“NCERT textbook-rangko ra·gatanichi chatro chatrirangko competitive exam-rangna tarisona man·gen ine a·dokni Education Minister aro MDA sorkari a·kangenga indiba iana sakkirangara bao? Ian uamangni daitotangko ka·gija, gele katna jotton ka·aniko mesokani gitasa ong·enga. NCERT-ni textbook-rangko ja·rikani pal maini gimin uamang, a·doktangni curriculum-ko namdapatna man·jaenga?” ine Marak sing·doataha.
NCERT textbook-rangko ra·gatna a·dok sorkarini miksongenganiko TMC Parliamentary Party-ni dilgipa Mukul Sangma-ni jegalatahani giminba TMC-ni chadambe dolko dilgipa, chakpaaniko parakataha.
“A·doko NCERT-ni textbook-rangko ra·gatna tik ka·aniara da·o aro mikkangchiba manderangna namgipa lekka porako on·anio champenga gitasa ong·gnok. An·chingo a·doktangni education board dongani gimin an·ching rasong chanasa nanga aro syllabus-ko taridapna gitaba an·ching jakgitel ong·a,” ine Marak parakataha.
Meghalaya a·dokni skulrango class 1-oni class 10-ona NCERT-ni textbook-rangko ra·gatna sorkarini miksongenganiara da·o aro mikkangchiba manderangoniko ra·seke ra·ani gitasa ong·gnok ine a·dokni gitcham chief minister aro Trinamool Congress (TMC) parliamentary party-ni president Mukul Sangma parakatenba, a·doko NCERT-ni textbook-rangko ra·gatjachina a·dok sorkariko didiatahachim.
A·doko NCERT textbook-rangko ra·gatna tik ka·aniko jegalatengon, “Ia ong·gijagipa ja·ku de·aniko dakjachina anga sorkariko aganenga. NCERT textbook-rangko ra·gatgenchimode da·o aro mikkangchiba manderangni bilko ra·sekani gitasa ong·gnok aro iako chinga ong·na on·na man·jawa,” ine Sangma aganahachim.
“Je a·dokrangan a·doktangni education board donga, una rasong chanasa nanga,” ineba ua aganahachim.
Uni chief minister ong·engmiting somoio ia apsan dakgipa proposal-kon uona ra·baahachim ine gisik ra·atpilangengon, “Na·simango board donga ong·ode maini gimin gipinrangna bate syllabus-ko nambate tarina man·jaenga? A·doko NCERT textbook-rangko ra·gatna aganeba na·simang Khasi aro Garo ku·sikrangko Constitution-ni Eighth Schedule-o napatna gita dabienga. Ki·tap segiparang an·chingo dongpileba NCERT-ni tarigimin ki·taprangkosa na·simang brena nangnikenga?,” ine Sangma, a·dok sorkariko sing·doataha.
 |
ReplyForward
|
